മകരനിലാവ്

തിരിയുന്ന കാലചക്രം

2011-06-18T10:25:00.000-07:00

ഇന്നലെ മറൈന്‍ ഡ്രൈവില്‍ നിന്നും കപ്പലണ്ടി വാങ്ങിച്ച കോണ്‍ കടലാസ് ചുമ്മാ ഒന്ന് നിവര്‍ത്തി നോക്കിയതാ .. 2213 ഡിസംബര്‍ മാസത്തിലെ പത്രമായിരുന്നു അത് ..

വാര്‍ത്ത ഇതായിരുന്നു . .

" ഫിസിക്സിലെ ഉത്തരം കിട്ടാത്ത ചോദ്യങ്ങളുടെയും യൂണിവേഴ്സിന്റെ ഉല്‍പ്പത്തിയുടെയും ഒക്കെ രഹസ്യങ്ങള്‍ തേടി ഒരു കൂട്ടം ശാസ്ത്രഅജ്ഞ്ഞന്മാര്‍ ഇരുനൂറു വര്‍ഷങ്ങള്‍ക്കു മുന്പ് ഭൂമിക്കടിയില്‍ മുപ്പതു കിലോമീറ്റര്‍ നീളമുള്ള തുരങ്കം സൃഷ്ടിച്ചതിനെ പുനരാവിഷ്ക്കരിക്കാന്‍ പോകുന്നു . . സയന്‍സ് ഇത്രയേറെ പുരോഗമിച്ചിട്ടും ലക്ഷം കോടി ഡോളര്‍ ചിലവിട്ടു നടത്തുന്ന ഈ പ്രഹസനം ഇതിനകം തന്നെ പുരോഗമനവാദികളുടേയും ആധുനിക ശാസ്ത്രജ്ഞന്മാരുടെയും എതിര്‍പ്പ് ക്ഷണിച്ചു വരുത്തിക്കഴിഞ്ഞു..

ഇരുനൂറു വര്‍ഷം മുന്‍പ് വളരയേറെ കൊട്ടിഘോഷിച്ചു നടത്തിയ ലാര്‍ജ്ജ് ഹാഡ്രോണ്‍ കൊളൈഡര്‍ (Large Hadron Collider) എന്ന ഈ പരീക്ഷണം നടത്തിയതില്‍ നിന്നും ഫിസിക്സില്‍ ഒരുപാട് ചോദ്യങ്ങളുടെ ഉത്തരം കിട്ടിയിട്ടുണ്ട് എന്നാണു ഇതിന്റെ നടത്തിപ്പുകാരായ ചില തൈക്കിളവന്മാര്‍ അവകാശപ്പെടുന്നത് . .

പ്രോട്ടോണ്‍ കണങ്ങളെ 27 കിലോമീറ്റര്‍ ചുറ്റളവുള്ള സഞ്ചാരപഥത്തില്‍ വിപരീതദിശകളില്‍ ഏകദേശം പ്രകാശപ്രവേഗത്തില്‍ പായിച്ച് കൂട്ടിയിടിപ്പിയ്ക്കാനുള്ള ഉപകരണമാണ്‌ പോലും ഈ ലാര്‍ജ്ജ് ഹാഡ്രോണ്‍ കൊളൈഡര്‍ !

ആറ്റത്തിന്റെ ന്യൂളിയസില്‍ കാണുന്ന ഒരു ചാര്‍ജ് ആണ് പ്രോട്ടോണ്‍ എന്നായിരുന്നു പ്രാചീന സങ്കല്പം .. എന്നാല്‍ , ആറ്റം എന്ന സങ്കല്പം പോലും ഫിസികില്‍ നിന്നും ഉന്മൂലനം ചെയ്തതിന്റെ നൂറാം വാര്‍ഷികം കഴിഞ്ഞ ശേഷവും ഇങ്ങനെ ഒരു പരീക്ഷണം നടത്തുന്നതിന്റെ ആവശ്യകത എന്താണെന്നാണ് ആധുനിക ശാസ്ത്രലോകം ഉന്നയിക്കുന്ന ചോദ്യം . .

ഇരുനൂറു വര്‍ഷം മുന്‍പ് നടത്തിയ ലാര്‍ജ്ജ് ഹാഡ്രോണ്‍ കൊളൈഡര്‍ പരീക്ഷണം പരാജയപെട്ടതിനു ശേഷം പിരിച്ചു വിട്ട European Organization for Nuclear Research (CERN) എന്ന സംഘടനയുടെ വേരുകള്‍ ഇപ്പോഴും നിലനില്‍ക്കുന്നുണ്ട് എന്നതിന് തെളിവാണ് ഇപ്പോള്‍ നടത്താന്‍ ഉദ്ദേശിക്കുന്ന ഈ പ്രാചീന ദൗത്യം. .

ഇന്ന് ഉപയോഗിക്കുന്ന കീസ്ടോന്‍ എന്ന പ്രകാശ രശ്മിയുടെ ലക്ഷത്തിലൊന്നു കരുത്തില്ലാത്ത ലേസര്‍ എന്ന ദുര്‍ബലമായ ഒരു പ്രകാശധാര അന്ന് ഉപയോഗിച്ചിരുന്നതിനു തെളിവുണ്ട് .. എന്ന് മാത്രമല്ല , രാജ്യങ്ങള്‍ തമ്മില്‍ യുദ്ധം നടക്കുമ്പോള്‍ വാലില്‍ തീ കത്തിച്ചു കൊണ്ട് ശത്രുരാജ്യത്തേക്ക് പറത്തി വിടുന്ന മിസൈലും , അത് പോലെ തന്നെ ഭൂമിയിലേക്ക്‌ ആവശ്യമായ സിഗ്നലുകള്‍ അയക്കാന്‍ ആകാശത്തേക്ക് തൊടുത്തു വിടുന്ന റോക്കറ്റുകളും ഉപഗ്രഹങ്ങളും ഒക്കെ അന്നുള്ള മനുഷ്യര്‍ ഉപയോഗിച്ചിരുന്നു ..

ദ്രവ്യത്തിന്റെ ആറാമത്തെ അവസ്ഥ കണ്ടു പിടിച്ചിട്ട് ഒരു നൂറ്റാണ്ട് ആകുന്ന ഈ അവസരത്തില്‍ , പ്ലാസ്മ പോലും വ്യക്തമായി കണ്ടു പിടിക്കുന്നതിനു മുന്‍പേ നടത്തിയ ഈ ചിലവേറിയ പരീക്ഷണം നടത്തുന്നതിന്റെ ലോജിക് മനസ്സിലാകുന്നില്ല ..

ഒരു ആര്യ- ദ്രാവിഡ - ഫ്രഞ്ച് - റഷ്യന്‍ സംഘമാണ് ഇതിന്റെ പിന്നില്‍ എന്നാണു അറിയാന്‍ കഴിഞ്ഞത്. .

പോക്കറ്റിലിട്ടു കൊണ്ട് നടക്കാവുന്ന വലിപ്പം മാത്രം ഉള്ള ഒരു ഉപകരണത്തില്‍ നിന്നും പ്രകാശത്തിന്റെ ആയിരം മടങ്ങ്‌ വേഗതയില്‍ സഞ്ചരിക്കുന്ന ഗ്രൂന്‍ടോണ്‍ കണങ്ങളെ ഏതു ദിശയില്‍ വേണമെങ്കിലും കൂട്ടി ഇടിപ്പിക്കാണോ ഇടിപ്പിക്കാതിരിക്കാണോ കഴിയുന്ന ഈ കാലത്ത് മുപ്പതു കിലോമീറ്റര്‍ തുരങ്കം ഉണ്ടാക്കുന്നവരുടെ തലയിലെ ഓളം എന്താണെന്ന് ഊഹിക്കാവുന്നതെയുള്ളൂ

അസുഖം മാറാന്‍ ഉരുണ്ടതും വലുപ്പമേറിയതും ആയ ക്യാപ്സൂളുകളില്‍ മനുഷ്യര്‍ മരുന്നു കഴിച്ചിരുന്ന ഒരു ബാര്‍ബേറിയന്‍ കാലത്തെ തിരിച്ചു കൊണ്ട് വരുവാനുള്ള ഇവരുടെ ശ്രമം ചെറുക്കുവാന്‍ ഉത്തരവാദിത്വബോധമുള്ള നൂറ്റമ്പതു വയസ്സില്‍ താഴെയുള്ള ചെറുപ്പക്കാരുടെ ഒരു സംഘം ഇറങ്ങിത്തിരിച്ചു കഴിഞ്ഞു .. അവരുടെ പ്രയത്നങ്ങള്‍ പൂവണിയട്ടെ എന്ന് നമക്ക് പ്രാര്‍ഥിക്കാം "

പത്രക്കഷ്ണം എടുത്തു കടലില്‍ എറിഞ്ഞിട്ട് ഞാന്‍ കൂട്ടുകാരനോട് പറഞ്ഞു

" കഷ്ടം! വാര്‍ത്തകള്‍ പേപ്പറില്‍ വായിച്ചിരുന്ന ഒരു കാലമുണ്ടായിരുന്നു .. ഏകദേശം അമ്പതു വര്‍ഷം മുന്നേ .. പണ്ടത്തെ മനുഷ്യര്‍ എന്തൊക്കെ സഹിച്ചിരുന്നു .. അത്ഭുതം തന്നെ"

ലേബല്‍ : കാലചക്ക്രത്തെ നോക്കി കൊഞ്ഞനം കുത്തുന്ന പച്ചപ്ലാവിലകള്‍

വിഭൂതി, ഇനി ചാരം

2011-04-24T11:43:00.000-07:00

 
 അങ്ങനെ , ശൂന്യതയില്‍ നിന്നും ജീവന്‍ തിരിച്ചു പിടിക്കാന്‍ കഴിയാതെ ഒരു ദൈവം കൂടി തോല്‍വി സമ്മതിച്ചിരിക്കുന്നു ..

  സായിബാബ എന്ന മജീഷ്യനെ വലിയ മതിപ്പില്ല .. പുള്ളിക്കാരന്‍ കാണിച്ചിരുന്ന മാജിക് ഒരു പഴഞ്ചന്‍ ഗ്രാമീണ സ്റ്റൈല്‍ ചെപ്പടി വിദ്യ മാത്രമായിരുന്നു. . നല്ല മാജിക് കാണണമെങ്കില്‍ ഹൌഡിനിയുടെയോ , ഡേവിഡ്‌ കോപ്പര്‍ ഫീല്‍ഡിന്റെയോ , ഡേവിഡ്‌ ബ്ലെയിന്റെയോ , ഒന്നുമല്ലേല്‍ നമ്മുടെ സ്വന്തം മുതുകാടിന്റെയോ ഒരുപാട് മാജിക്ഷോ വീഡിയോസ് യൂട്യൂബില്‍ കിട്ടും .. എനിക്കാണെങ്കില്‍ മനുഷ്യ ദൈവങ്ങളോടുള്ള എതിര്‍പ്പും വേണ്ടുവോളമുണ്ട് .. [ ഉറഞ്ഞു തുള്ളുന്ന ഒരു മനുഷ്യ ദൈവത്തിന്റെ ഗിമ്മിക്കുകള്‍ പരോക്ഷമായെങ്കിലും ജീവിതത്തില്‍ കയ്പ്പേറിയ അനുഭവങ്ങള്‍ തന്നിട്ടുള്ളത് കൊണ്ട് ആ ഗണത്തോട് നല്ല വെറുപ്പാണ്:-) ] സായിബാബയും മറ്റും മാജിക് കാണിക്കുന്നത് കാണുമ്പോള്‍ ഈ രംഗമാണ് ഓര്‍മ വരുന്നത്.. :-D
  പക്ഷെ പലപ്പോഴും ആശ്ചര്യപ്പെട്ടിട്ടുണ്ട്.. ഇത്രയധികം ഫാന്‍സ്‌ ആന്‍ഡ്‌ ഫോളോവേര്സ് ആ വ്യക്തിക്ക് എങ്ങനെ ഉണ്ടായി എന്നും , ഈ പറയുന്ന ജനങ്ങളൊക്കെ എന്നാ കണ്ടിട്ടാണ് ഇങ്ങനെ ഒരു മനുഷ്യ ദൈവത്തെ ആരാധിക്കുന്നത് എന്നും .. നമ്മളൊക്കെ ഏതേലും കവലയില്‍ പോയി പ്രസംഗം നടത്തിയാല്‍ ആരേലും തിരിഞ്ഞു നോക്കുവോ .. ഈ പുള്ളിക്കാരനാണെങ്കില്‍ നൂറ്റമ്പതോളം രാജ്യങ്ങളില്‍ കോടിക്കണക്കിനു ആരാധകര്‍ (ഭക്തര്‍ന്ന് അവര് പറയും) !

 നമുക്ക് ഒട്ടും ചേരാത്ത ബുദ്ധിജീവി ലൈന്‍ ഒന്ന് മാറ്റിപ്പിടിച്ചാല്‍ ചിലപ്പോള്‍ ഉത്തരം കിട്ടിയേക്കും ..

  ഇന്ന് പുട്ടപര്‍ത്തി എന്ന ഒരു പട്ടണം അനേകലക്ഷം പട്ടിണിപ്പാവങ്ങള്‍ക്കു അന്നദാതാവാണ്. എല്ലാവര്‍ക്കും ശുദ്ധജലവും ഭക്ഷണവും സൗജന്യമായി കൊടുക്കാന്‍ ഏതെങ്കിലും സര്‍ക്കാരിനോ രാഷ്ട്രീയപ്പാര്‍ട്ടിക്കോ കഴിയാത്ത ഈ ഇന്ത്യാമഹാരാജ്യത്ത് ഇതിലും വലിയ സേവനം കാണാന്‍ കഴിയില്ല.. രാജ്യത്തിലെ തന്നെ ഏറ്റവും മികച്ച സൂപ്പര്‍ സ്പെഷ്യാലിറ്റി ഹോസ്പ്പിറ്റലുകള്‍ , അവിടെ നിര്‍ധനരായ രോഗികള്‍ക്ക് എത്ര വലിയ ചികിത്സയും സൗജന്യം.
ഏറ്റവും മികച്ച ഗവേഷണ ശാലകള്‍ , സര്‍വകലാശാലകള്‍ , സ്കൂളുകള്‍ , കോളേജുകള്‍ .. പ്രത്യക്ഷവും പരോക്ഷവുമായി പതിനായിരക്കണക്കിനു ജോലികള്‍ .. അത് വഴി കഞ്ഞി കുടിച്ചു പോകുന്ന എണ്ണമറ്റ കുടുംബങ്ങള്‍ .. ഒറീസയിലും ആന്ധ്രയിലും മഹാരാഷ്ട്രയിലും മറ്റും പ്രകൃതിക്ഷോഭങ്ങളാല്‍ വീട് നഷ്ട്ടപെട്ട പാവങ്ങള്‍ക്ക് പുനരധിവാസം.. തുടങ്ങി അനേകം അനേകം സാമൂഹ്യ സേവനങ്ങള്‍ .

  ഈ പറയുന്ന ഭക്തി ബിസ്സിനസ്സിന്റെ മറവില്‍ സായിബാബ കാട്ടിക്കൂട്ടുന്ന 'ഭീകര പ്രവൃത്തികള്‍ ' എന്ന പേരില്‍ പലരും ആരോപണങ്ങള്‍ ഉന്നയിക്കുന്നത് കണ്ടു.. അങ്ങേരുടെ കൂടെ പതിറ്റാണ്ടുകളോളം നടന്നിട്ട് പിന്നീട് പീഡന ശ്രമത്തിനു കേസ് കൊടുത്ത ചില ഒറ്റപ്പെട്ട സംഭവങ്ങള്‍ മാത്രമാണ് ആകെയുള്ള പിടിവള്ളി.. അത് കേള്‍ക്കുമ്പോള്‍ കേരളത്തിലെ ചില കോമഡി പീഡനകഥകള്‍ ആണ് ഓര്‍മ വരുന്നത്.. എന്തായാലും ഈ ഭക്തി ഷോയുടെ മറവില്‍ ദേശദ്രോഹ പ്രവൃത്തിയോ ആയുധ/മയക്കുമരുന്ന് വ്യാപാരമോ , തീവ്രവാദമോ .അണ്വായുധ നിര്‍മ്മാണമോ ഉണ്ടെന്നു കരുതാന്‍ വയ്യ .. അങ്ങനെ ഇല്ലാതെയിരിക്കുന്ന കാലത്തോളം ഈ ബിസ്സിനസ്സില്‍ ഒരു കുറ്റവും പറയാനും വയ്യ.. വേണ്ടവന്‍ ഭക്തിച്ചാല്‍ മതി .. അല്ലാത്തവന്‍ മിണ്ടാതിരുന്നാല്‍ പോരെ ?

  വിഷം തളിച്ച് ജനങ്ങളെ കൊന്നിട്ടും കൊന്നിട്ടും മതിവരാതെ ആ വിഷത്തിന്റെ പുസ്തകോം പിടിച്ചു ഡിഗ്രിക്ക് പഠിച്ചുകൊണ്ടേയിരിക്കുന്ന മന്ത്രിമാരും , കര്‍ഷകര്‍ ആത്മഹത്യ ചെയ്താലും നെല്ല് കെട്ടിക്കിടന്നു ചീഞ്ഞു പോയാലും ക്രിക്കറ്റ് കളി ഭംഗിയായി നടക്കണം എന്ന് പറയുന്ന മന്ത്രിമാരും ഉള്ള ഒരു രാജ്യത്താണ് ഭക്തി ബിസിനസ്സിനെ കുറ്റം പറയാന്‍ കുറെ ബുജികള്‍ ഇറങ്ങിയിരിക്കുന്നത് .

  ഭക്തി വിറ്റു കാശാക്കുന്നു എന്ന് പറഞ്ഞു സായിബാബയെ നല്ല പച്ചത്തെറി പറയുന്ന ഒരുപാട് ഇന്റര്‍നെറ്റ്‌ പോസ്റ്റുകള്‍ കാണാനിടയായി.. എല്ലാവരും പുള്ളീനെ അങ്ങട് ഉഴുതു മറിച്ചു. പുള്ളിക്ക് നാല്‍പ്പതിനായിരം കോടി രൂപയുടെ സ്വത്തു ഉള്ളതാണ് എല്ലാവരുടേം പ്രശ്നം.. എന്റെ അറിവില്‍ സായിബാബ നിര്‍ബന്ധിത നികുതി പിരിവു നടത്തുന്നില്ല , അഴിമതിയും അക്ക്രമവും കൊണ്ട് ജനങ്ങളെ ദ്രോഹിക്കുന്നില്ല.. പിന്നെ , വേണമെങ്കില്‍ പറയാം ഭക്തി,കച്ചവടം,പാവങ്ങളെ പറ്റിക്കല്‍ , വിശ്വാസത്തില്‍ ചേര്‍ക്കല്‍ എന്നൊക്കെ .. നമുക്കാര്‍ക്കും ചെയ്യാന്‍ പറ്റാത്ത നല്ല കാര്യങ്ങള്‍ വേറൊരാള്‍ ചെയ്യുമ്പോള്‍ അതിനെ ഏതെങ്കിലും രീതിയില്‍ എതിര്‍ക്കുക, ചെറിയ തെറ്റുകള്‍ വലുതാക്കി കാണിക്കുക, അതിലൂടെ കിട്ടുന്ന ഒരു മറ്റേ ഫീലിംഗ് എന്ജോയ്‌ ചെയ്യുക എന്ന സ്ഥിരം തത്വം തന്നെയാണ് ഇവിടെയും നടക്കുന്നത് . . നിര്‍ബന്ധിതമായി നികുതി പിരിച്ചു , കാലാകാലങ്ങളോളം ഇന്ത്യയിലെ ജനങ്ങളെ പറ്റിച്ചും വിഡ്ഢികളാക്കിയും ജീവിക്കുന്ന രാഷ്ട്രീയക്കാരുടെ സ്തുതിപാഠകര്‍ ഇങ്ങനെ പറഞ്ഞില്ലെങ്കിലാണ് അത്ഭുതം ..

  ഇവിടിരുന്നു ഇങ്ങനെ കുറ്റം പറയാന്‍ പറ്റുന്ന സാമ്പത്തിക , സാമൂഹ്യ , ആരോഗ്യ സ്ഥിതി ഉള്ളത് കൊണ്ട് ഈ ബുദ്ധിജീവികള്‍ നന്നായി കത്തിക്കയറുന്നുണ്ട് . ഇതൊന്നുമില്ലാത്ത , അരപ്പട്ടിണിയും മുഴുപ്പട്ടിണിയും , അതിന്റെ പുറമേ മാറാരോഗങ്ങളും മാത്രം കൈമുതലായുള്ള അനേക ലക്ഷം ഇന്ത്യന്‍ മണ്ടന്മാര്‍ സായിബാബയെ ദൈവമായി കാണുന്നതില്‍ എന്ത് അത്ഭുതം സഖാവേ ? കയ്യില്‍ അഞ്ചു പൈസയില്ലാതെ വരുമ്പോള്‍ , ജോലി ചെയ്യാന്‍ ആരോഗ്യമില്ലാതെ വരുമ്പോള്‍ , കുഞ്ഞുങ്ങളുടെ വിശപ്പ്‌ മാറ്റാന്‍ വേറെ മാര്‍ഗമില്ലാതെ വരുമ്പോള്‍ സഖാവും ഇതുപോലുള്ളവരുടെ ഭക്തനായിപ്പോകും , കാരണം , അപ്പോള്‍ ജീവന്‍ നിലനിര്‍ത്താനുള്ള ഭക്ഷണവും മരുന്നും പ്രത്യയശാസ്ത്രങ്ങളെ മറികടക്കും .. ഇത് മനസ്സിലാക്കാന്‍ കൊകോസ്നൂസിഫെറാക്കുല അല്ലെങ്കില്‍ മാഗ്നിഫെറാഇന്ടിക്കാസ്കിന്‍ മുതലായ ബലിയ ബാചകങ്ങള്‍ ഒന്നും അറിയേണ്ട.. അല്‍പ്പം കോമണ്‍സെന്‍സ് മതി ..

NB : എന്തായാലും ഈ ഭക്തി ഷോയുടെ മറവില്‍ ദേശദ്രോഹ പ്രവൃത്തിയോ ആയുധ/മയക്കുമരുന്ന് വ്യാപാരമോ , തീവ്രവാദമോ .അണ്വായുധ നിര്‍മ്മാണമോ ഉണ്ടെന്നു കേട്ടിട്ടില്ല .. അങ്ങനെ ഇല്ലാതെയിരിക്കുന്ന കാലത്തോളം ഈ ബിസ്സിനസ്സില്‍ ഒരു കുറ്റവും പറയാനും വയ്യ. [ഒന്നൂടി സ്‌ട്രെസ് ചെയ്തു പറഞ്ഞൂന്നേയുള്ളൂ .. ഇനി അങ്ങനെ വല്ലതും ഉണ്ടായാല്‍ നാളെ എനിക്കിട്ടു തിരിച്ചു പണി വരരുതല്ലോ :-) ]

പൗരന്റെ വോട്ട്

2011-03-28T11:26:00.000-07:00

അങ്ങനെ വീണ്ടും അത് വന്നെത്തി . പ്രഹസനവും അധപ്പതനവും _ന്തയില്ലാത്തരവും** കൊണ്ടു സമ്പന്നരായ രാഷ്ട്രീയക്കാര്‍ക്ക് പേക്കൂത്ത് കാണിക്കാന്‍ വേണ്ടിയുള്ള ആ നാടകം വന്നെത്തി . ജനാധിപത്യ വിശ്വാസി എന്ന നിര്‍ബന്ധിത ലേബലില്‍ നിന്നു കൊണ്ടു പറയുന്നതില്‍ ദുഖമുണ്ട്.

എന്നാലും പറയാതെ വയ്യ ...

അവസരം കിട്ടിയാല്‍ (കിട്ടിയില്ലെങ്കില്‍) സ്വന്തം അമ്മയെ പോലും വിറ്റു കാശാക്കുന്ന ഈ രാഷ്ട്രീയക്കാര്‍ക്ക് വളം വച്ചു കൊടുക്കുന്ന വെറും ഒരു ഏര്‍പ്പാടായി തിരഞ്ഞെടുപ്പ് എന്ന ഈ പ്രക്രിയ മാറി എന്ന് തോന്നിപ്പോകുന്നു. ചൂണ്ടു വിരലില്‍ പുരണ്ട കറുത്ത മഷി മറ്റുള്ളവരെ അഭിമാനത്തോടെ കാണിച്ചിരുന്ന ഒരു കാലത്തില്‍ നിന്നും ഇപ്പോള്‍ മനസ്സ് ഒരുപാട് മാറിപ്പോയി

ഈ കൊച്ചു കേരളത്തിലെ സീറ്റ് വിഭജനം എന്ന പേരില്‍ ഇവര്‍ കാണിച്ചു കൂട്ടുന്ന പരാക്ക്രമങ്ങള്‍ കാണുമ്പോള്‍ മാത്രമാണ് , ചവറ്റുകൊട്ടയിലെ എല്ലിന്‍കഷ്ണം തിന്നാന്‍ തെരുവ് നായ്ക്കള്‍ കടിപിടി കൂടുന്നത് എത്ര മാന്യതയോടെയാണ് എന്ന് മനസ്സിലാവുന്നത്. കനകവും കാമിനിയും ഒന്നുമല്ല , അധികാരമാണ് ഏറ്റവും വലിയ ഭ്രാന്തും കലഹകാരണവും എന്ന് ഇവര്‍ നമുക്ക് വൃത്തിയായി കാണിച്ചു തരുന്നു.

കരുണാകരനും മഹനും ചേര്‍ന്നു കഴിഞ്ഞ തിരഞ്ഞെടുപ്പ് കാലത്ത് നടത്തിയ ഡിക്ക് (DIC-K) കലാപത്തിനു ശേഷം കേരളം കണ്ട ഏറ്റവും നാറിയ ചില രാഷ്ട്രീയ നീക്കങ്ങള്‍ക്കാണ് ഈ തിരഞ്ഞെടുപ്പ് സാക്ഷ്യം വഹിക്കുന്നത്.

ബ, ജ , ഭ എന്നീ ശബ്ദങ്ങള്‍ക്ക്‌ പുറമേ സീറ്റ് , മന്ത്രി എന്ന് മാത്രം പറയാന്‍ കെല്‍പ്പുള്ള ഒരു വൃദ്ധയുടെ പരാക്ക്രമം തന്നെ ഏറ്റവും ഭീകരം. രാഷ്ട്രീയത്തില്‍ ജീവിച്ചു രാഷ്ട്രീയത്തില്‍ മരിക്കാനുള്ള അവരുടെ ആഗ്രഹത്തോട് എതിര്‍പ്പില്ല. പക്ഷെ അതിനു അധികാരവും മന്ത്രിപദവും കിട്ടിയാല്‍ മാത്രമേ സാധിക്കൂ എന്ന അവരുടെ അത്യാര്‍ത്തി കാണുമ്പോള്‍ സഹതാപത്തെക്കാള്‍ ഏറെ ഭയം തോന്നുന്നു

എട്ടാം വയസ്സില്‍ കടത്തിണ്ണയില്‍ കിടന്നുറങ്ങിയ ശേഷം കോണ്ഗ്രസ്സിന്റെ പ്രചാരണ പരിപാടിക്ക് പോയ ചരിത്രമുള്ള ജയാ ഡാലി തിരഞ്ഞെടുപ്പ് അടുത്തപ്പോള്‍ പാര്‍ട്ടി വിട്ടത് കേരളത്തിലെ വനിതകള്‍ക്ക് സുരക്ഷിതമായി ഉറങ്ങാന്‍ കടത്തിണ്ണ ഇല്ലാത്തത് കൊണ്ടാണെന്ന് ചിലര്‍ പറയുന്നത് ഞാന്‍ വിശ്വസിച്ചിട്ടില്ല ! എന്തായാലും, കാട്ടാക്കടയില്‍ സീറ്റ് കിട്ടാതെ ചാനലുകാര്‍ക്ക് മുന്നില്‍ പൊട്ടിക്കരയുന്ന ഡാലിയെ പിന്തുണയ്ക്കാന്‍ തലേ ദിവസംവരെ അവരെ തെറി മാത്രം പറഞ്ഞിരുന്ന കമ്യൂണിസ്റ്റ് പാര്‍ട്ടിക്കാര്‍ മാത്രമേ ഉണ്ടായിരുന്നുള്ളൂ എന്നറിയുമ്പോള്‍ ആരും പുളകിതരായിപ്പോകും

ജന്മി കുടുംബത്തില്‍ ജനിച്ചിട്ടും നാട്ടിലെ പാവങ്ങള്‍ക്ക് വേണ്ടി സ്വത്തു മുഴുവന്‍ വിറ്റു തുലച്ച ശേഷം കൊട്ടാരക്കര രാജ്യത്തിന്റെ സ്വാതന്ത്ര്യത്തിനു വേണ്ടി ജയിലില്‍ പോകേണ്ടി വന്ന ബാലകൃഷ്ണപിള്ളയാണ് ഈ തിരഞ്ഞെടുപ്പിന്റെ രക്തസാക്ഷി. ഒരു ഏസി പോലുമില്ലാത്ത ജയിലില്‍ കിടന്നു കൊണ്ടു തിരഞ്ഞെടുപ്പില്‍ മത്സരിക്കാന്‍ അദ്ദേഹം കാണിച്ച ചങ്കുറപ്പിനെ മിനിമം ഭഗത് സിംഗിന്റെ ധീരതയോടു ഉപമിക്കണം എന്ന് ഏതോ ഒരു സിനിമാനടന്‍ പറയുന്നതും കേട്ടു.

എല്ലാരും പറഞ്ഞ് പറഞ്ഞ് ആ കുഞ്ഞാടിനെ ഒരു വഴിക്കാക്കി.. എന്നാലും പറയാതെ വയ്യ.. എസ് എഫ് ഐയുടെ പ്രസിഡന്റും പ്രധാനമന്ത്രിയും ഗവര്‍ണറും ഒക്കെ ആയി നാട് മുഴുവന്‍ ക്രച്ചസ്സിലും അല്ലാതെയും നടന്നു. കുഞ്ഞിളം പ്രായത്തില്‍ രണ്ടു തിരഞ്ഞെടുപ്പുകളില്‍ ഏറ്റവും ഭീകരന്മാരുടെ എതിരാളിയായി ബലി കഴിക്കപ്പെട്ടു. പക്ഷെ അന്നൊന്നും മാര്‍ക്സിസ്റ്റ്‌ പാര്‍ട്ടി പള്ളിക്കാര്‍ക്ക് എതിരായിരുന്നു എന്ന് പാവം ആ പെണ്‍കുട്ടി അറിഞ്ഞില്ല. (സ്റ്റഡി ക്ലാസ്സുകളില്‍ കൃത്യമായി പോകാഞ്ഞത്‌ കൊണ്ടാണ് ഇങ്ങനെ സംഭവിച്ചത് എന്ന് വേണം കരുതാന്‍ ).

ഇത്തവണ സീറ്റ് വിഭജിച്ചപ്പോള്‍ മാത്രമാണ് കമ്യൂണിസ്റ്റ് പാര്‍ട്ടിക്ക് ദൈവ വിശ്വാസമില്ല എന്ന നഗ്നസത്യം കുഞ്ഞാട് മനസ്സിലാക്കിയത് . യേശുവാണെന്ന് കരുതി ആ കുട്ടി കുരിശു വരച്ചത് മുഴുവന്‍ ചെഗുവേരയുടെ പടങ്ങളിലായിരുന്നു പോലും. പിന്നെയൊന്നും നോക്കിയില്ല , നേരെ പുതുപ്പള്ളിയില്‍ ചെന്നു ഇടയന്മാരുടെ (അദ്ദന്നെ, മിണ്ടിയാല്‍ ഇടയുന്നവര്‍ തന്നെ) ഇടയനായ ഉമ്മന്‍ ചാണ്ടിയുടെ ഇടവകപ്പള്ളിയില്‍ പോയി കുര്‍ബാന കൈക്കൊണ്ട് ക്വാണ്‍ഗ്രസ്സുകാരിയായി.

കെ കെ രാമചന്ദ്രന്‍ ഗുരുക്കള്‍ ആറു വര്‍ഷമായി വിങ്ങി വിങ്ങി ഇരുന്നെങ്കിലും കഴിഞ്ഞ ദിവസമാണ് ഒന്നു കരയാന്‍ സാധിച്ചത്. ചാണ്ടിയും ചെന്നിത്തലയും ഹെലികോപ്ടറില്‍ പറന്നു നടക്കുന്ന സീന്‍ കണ്ടപ്പോഴാണ് പണ്ട് തന്നേ അഴിമതിക്ക് പ്രേരിപ്പിച്ചത് അവരാണെന്ന ബോധം പെട്ടന്ന് ഗുരുക്കള്‍ക്ക്‌ ഉദിച്ചത് . കരഞ്ഞു പോയി പാവം.

ഇനീമുണ്ട് താരങ്ങള്‍ .. സ്റ്റീഫന്‍ ജോര്‍ജ് അണ്ണന്‍ , ശോഭന ജോര്‍ജ് ആന്റി .. പട്ടിക നീളുന്നു..

എംഎല്‍ഏയോ മന്ത്രിയോ ആയി കൊടി വച്ച കാറില്‍ നൂറ്റിപ്പത്ത് കിലോമീറ്റര്‍ സ്പീഡില്‍ പോയാല്‍ മാത്രമേ ജനങ്ങളെ സേവിക്കാന്‍ പറ്റുകയുള്ളു എന്ന് കരുതുന്നവരുടെ പട്ടിക നീണ്ടു പോയ്ക്കൊണ്ടേയിരിക്കുന്നു. ഇരുനൂറു രൂപയും പൈന്റും കിട്ടിയാല്‍ ഇവരില്‍ ആര്‍ക്കു വേണമെങ്കിലും ജയ് വിളിക്കാന്‍ കൂടെ നടക്കുന്ന അനുയായികള്‍ എന്ന മള്‍ട്ടിഫാതേര്‍ഡ് ഗുണ്ടകളും കൂടിയാവുമ്പോള്‍ കളം പൂര്‍ണമായി.

പണിയില്ലാത്തവന്മാര്‍ മാത്രമല്ല അനുയായികള്‍ . അങ്ങേയറ്റം അഭ്യസ്തവിദ്യരും ഉന്നത ജോലികളില്‍ വിരാജിക്കുന്നവന്മാരും പോലും ഇവന്മാരുടെ ഈ മൂന്നാംകിട ഗെയിമുകള്‍ക്ക് ചൂട്ടു പിടിക്കുന്ന കാഴ്ചയാണ് ബ്ലോഗിലും ബസ്സിലും മറ്റു സോഷ്യല്‍ നെറ്റ് വര്‍ക്കുകളിലും ഈയിടെ കാണുന്നത്. സ്കൂളിലും കോളേജിലും പഠിക്കുന്ന കാലത്ത് ഉണ്ടായിരുന്ന തരിപ്പിന്റെ പുറത്തു ഏതെങ്കിലും ഒരു കൊടി പിടിച്ചു നടന്നവന്മാരൊക്കെ ലോകത്തിന്റെ ഓരോ കോണിലിരുന്നു അതാതു രാഷ്ട്രീയ പാര്‍ട്ടികളെ യാതൊരു യുക്തിബോധവുമില്ലാതെ പ്രകീര്‍ത്തിച്ചു കൊണ്ടിരിക്കുന്നു.. സുഹൃത്തുക്കളേ , നിങ്ങളൊക്കെ ജനങ്ങള്‍ക്ക്‌ വേണ്ടി നല്ലത് മാത്രം ആഗ്രഹിക്കുന്നവരായിരിക്കാം.. എന്നാല്‍ നിങ്ങള്‍ അന്ധമായി അനുഗമിക്കുന്ന ഈ പ്രസ്ഥാനങ്ങള്‍ അവരുടെ മൂല്യങ്ങള്‍ എന്നേ നഷ്ട്ടപ്പെടുത്തിക്കഴിഞ്ഞു എന്ന് മനസ്സിലാക്കുക. നിങ്ങളും അവരുടെ ആവശ്യത്തിനു വേണ്ടി ബുദ്ധിപരമായി ഉപയോഗിക്കപ്പെടുന്ന വെറും ഉപകരണങ്ങള്‍ മാത്രം !

വോട്ട് ചെയ്യുക എന്നതാണ് ഏറ്റവും വലിയ പൗരധര്‍മം എന്ന് ഇലക്ഷന്‍ കാലത്ത് വിളിച്ചു കൂവുന്നത് ഈയിടെയായി ഒരു ഫാഷനായി മാറിയിട്ടുണ്ട്.അത് ചെയ്യാത്തവര്‍ ഉറങ്ങുകയാണ് പോലും. എന്തോ, അങ്ങനെ വിശ്വസിക്കുവാന്‍ ഇപ്പോള്‍ തോന്നുന്നില്ല. ആരെയൊക്കെ ജയിപ്പിച്ചാലും എന്തൊക്കെ സംഭവിച്ചാലും പ്രായാധിക്യം കൊണ്ടു കീറിപ്പറിഞ്ഞ ഒരു ഭരണഘടന അനുസരിച്ച് മാത്രമേ ഇവിടെ (സാധാരണക്കാര്‍ക്ക്) ജീവിക്കാന്‍ സാധിക്കൂ. പണമുള്ളവന് അതിന്റെ ഏതു പേജും വിലയ്ക്ക് വാങ്ങാം , പാവപ്പെട്ടവന്‍ എന്നും അതിന്റെ അടിമയും.

അഞ്ചു വര്‍ഷത്തില്‍ ഒരു ദിവസമെങ്കിലും രാജാവായി ജീവിക്കാനുള്ള ആഗ്രഹം കൊണ്ടു മാത്രമാണ് പലരും ഇപ്പോള്‍ വോട്ട് ചെയ്യാന്‍ പോകുന്നത്. ബാക്കി നാലു വര്‍ഷവും മുന്നൂറ്റി അറുപത്തിനാല് ദിവസവും ഇവന്മാരുടെയൊക്കെ അഴിമതിയും തെണ്ടിത്തരവും കയ്യാങ്കളിയും ഒക്കെ അനുഭവിക്കാന്‍ വേണ്ടി ആ ഒരു ദിവസം വെയിലത്ത്‌ ക്യൂ നിന്നു വോട്ട് ചെയ്തു ബുദ്ധിമുട്ടാന്‍ ഇനി എന്തായാലും വയ്യ. വോട്ടും കൊടുത്തു , കരവും അടച്ചു , കടിക്കുന്ന പട്ടിയെ വാങ്ങുന്ന ഈ ഏര്‍പ്പാട് ഇതോടെ നിര്‍ത്തി.

മറ്റുള്ളവനിട്ടു അറിഞ്ഞുകൊണ്ട് പണി കൊടുക്കാതിരിക്കുക , കഴിവില്ലാത്തവരെ നമ്മളാല്‍ ആവും വിധം സഹായിക്കുക , ഇതിനപ്പുറമുള്ള പൗരബോധം എന്തായാലും ഞാന്‍ വേണ്ടാന്നു വച്ചു.

തീയേറ്റര്‍ കിട്ടാതെ അനാഥ പ്രേതം പോലെ അലഞ്ഞ ഏതെങ്കിലും പടങ്ങള്‍ 'ഇലക്ഷന്‍ ദിന പ്രത്യേക ബ്ലോക്ക് ബസ്റ്റര്‍ ചലച്ചിത്രം' എന്ന പേരില്‍ ഏതെങ്കിലും ചാനലില്‍ ഉണ്ടെങ്കില്‍ ഈ ഇലക്ഷന്‍ ആ ചാനലിനൊപ്പം അടിപൊളിയായി ആഘോഷിക്കുവാന്‍ തീരുമാനിച്ച വിവരം ഏവരെയും വളരെ വ്യസനസമേതം അറിയിച്ചു കൊള്ളുന്നു . മറിച്ചു ചിന്തിക്കുവാന്‍ എന്തെങ്കിലും ദൈവം കാണിച്ചു തരുമായിരിക്കുമായിരിക്കുമായിരിക്കും എന്ന് പ്രാര്‍ഥിച്ചു കൊണ്ടു നിര്‍ത്തുന്നു . . . .

ടെയ്ല്‍പീസ്‌ : ഹാവൂ , ഞങ്ങളുടെ മണ്ഡലത്തില്‍ ഹൈബി ഈഡനും അഡ്വ.സെബാസ്റ്റ്യന്‍ പോളും .. രണ്ടു പേരും അത്യാവശ്യം വിവരം ഉള്ളവര്‍ തന്നെ :-)

(പോര്‍ക്കളം എന്നായിരുന്നു ആദ്യം പോസ്റ്റിന്റെ ടൈറ്റില്‍ .. പക്ഷെ കാലു കൊണ്ട് കമന്റിടുന്ന ആരെങ്കിലും കേറി മേഞ്ഞാലോ എന്ന് പേടിച്ചു മാറ്റിയതാണ്)

**ചിന്തയില്ലാത്തരവും

മാരകവിളക്ക് !

2011-01-16T11:37:00.000-08:00

അങ്ങനെ ദുരന്താഘോഷമത്സരം ഏകദേശം കഴിയാറായി. ഇത്തവണ പത്രങ്ങളെയും ചാനലുകളേയും ബഹുദൂരം പിന്നിലാക്കി സ്കോര്‍ ചെയ്തത് ബ്ലോഗ്ഗിലും ഗൂഗിള്‍ ബസ്സിലും ഒക്കെ ഉള്ളവര്‍ ആണെന്ന് കാണുന്നതില്‍ സന്തോഷമുണ്ട് ..

ഇന്റര്‍നെറ്റില്‍ നോക്കി , ഗൂഗിളില്‍ സെര്‍ച്ച് ചെയ്ത് , അപകടങ്ങള്‍ മുന്‍കൂട്ടി കാണാന്‍ കഴിവില്ലാത്ത വിഡ്ഢികളും വിവരദോഷികളും മോക്ഷദാഹികളുമായ അയ്യപ്പഭക്തന്മാര്‍ ഒക്കെ ഇപ്പോഴും ഈ രാജ്യത്ത് ഉണ്ടല്ലോ എന്ന് ഓര്‍ക്കുമ്പോള്‍ പുച്ഛം തോന്നുന്നു. അവരെ പറഞ്ഞിട്ട് കാര്യമില്ല. ഡിഎംകെ ഭരിക്കുന്ന തമിഴ്നാട്ടിലും ബിജെപി ഭരിക്കുന്ന കര്‍ണാടകയിലും സര്‍വോപരി ക്വാണ്‍ഗ്രസ് ഭരിക്കുന്ന ആന്ധ്രപ്രദേശിലും വിവരമുള്ള ആരേലും ഉണ്ടാകുവോ ? ഈ പറയുന്ന നാടുകളില്‍ നിന്നും മകരവിളക്ക്‌ കണ്ടു ആത്മഹത്യ ചെയ്യാന്‍ വരുന്ന ദൈവവിശ്വാസികള്‍ എന്ന് വിളിക്കപ്പെടുന്ന ന്യൂനപക്ഷങ്ങള്‍ വിചാരിക്കുന്നത് പൊന്നമ്പലമേട്ടില്‍ തെളിയുന്നത് ഓട്ടോമാറ്റിക് തീയാണെന്ന് പോലും. അവിടെ കാണുന്ന തീയും പുകയും ദേവസ്വം ബോര്‍ഡിന്റെ വെറും ഫ്രോഡ് പരിപാടിയാണെന്ന് അറിയുന്നവര്‍ ബംഗാളില്‍ നിന്നും വന്നിരുന്നെങ്കില്‍ ഈ കറുത്ത തമാശകള്‍മാറ്റി ഒരു ചുവപ്പ് തമാശക്കടല്‍ :-( [കൊല്ലരുത്, സ്മൈലി ഇട്ടിട്ടുണ്ട്] തന്നെ സൃഷ്ട്ടിക്കാന്‍ പറ്റുമായിരുന്നു ..പക്ഷെ എന്ത് ചെയ്യാം .. ദൈവം എന്ന വിലകുറഞ്ഞ വിശ്വാസത്തില്‍ അണിചേരാന്‍ അറിവും വിദ്യാഭ്യാസവും പൌര/ധര്‍മ ബോധങ്ങളും മറ്റും അവരെ അനുവദിക്കുന്നില്ല (ഇത് ദുരന്തത്തെ രാഷ്ട്രീയമായി മുതലെടുക്കാന്‍ എന്റെ ഭാഗത്ത്‌ നിന്നും ഒരു എളിയ ശ്രമം മാത്രം)

കപട യുക്തിവാദം/കപട പുരോഗമനവാദം എന്ന പ്രഹസനം കൊണ്ടു ഒരു ജനതയെ മുഴുവന്‍ വിഡ്ഢികളായി ചിത്രീകരിക്കുന്ന ചിലര്‍ക്ക് ശബരിമല അയ്യപ്പന്‍ വെറുമൊരു സിഈഒ മാത്രമാണ്. ഇരുപതു വര്‍ഷം കൊണ്ടു പതിനായിരത്തില്‍ നിന്നും നൂറ്റിയമ്പത് കോടി വരുമാനമുള്ള കമ്പനി ആയി ശബരിമലയെ മാറ്റിയ ഒരു സ്മാര്‍ട്ട്സിഈഒ !

എന്നാല്‍ , ശൈവമതവും വൈഷ്ണവമതവും ബുദ്ധമതവും ജാതി-മത-വംശ-ഭാഷാ വേര്‍തിരിവുകള്‍ ഇല്ലാതെ ആര്യനും ദ്രാവിഡനും, ക്രിസ്ത്യനും മുസല്‍മാനും, ബ്രാഹ്മണനും ചണ്ടാലനും ഒരേ രൂപത്തിലും ഭാവത്തിലും ഒത്തു ചേരാന്‍ കഴിയുന്ന ഒരു അനുഷ്ഠാനം എന്ന രീതിയില്‍ ഈ പ്രസ്ഥാനത്തെ കാണാന്‍ അവര്‍ മനപൂര്‍വം വിസ്മരിക്കുന്നു . അതും പോരാഞ്ഞിട്ട് അവിടെ സംഭവിച്ച ഒരു മഹാദുരന്തത്തിന്റെ മറ പിടിച്ചു തങ്ങളുടെ വികലമായ ആശയങ്ങള്‍ പ്രചരിപ്പിക്കാന്‍ ശ്രമിക്കുന്ന ഇവന്മാരെയൊക്കെ എന്ത് പറയാനാണ്..

തത്ത്വമസി

ദൈവവും മനുഷ്യനും ഒന്നാണ് .. ഈശ്വരന്‍ എന്നാല്‍ മനുഷ്യന്റെ ഉള്ള്ളില്‍ തന്നെ കുടികൊള്ളുന്ന ഒരു ശക്തിയാണ്.. കഠിനമായ തപസ്സിലൂടെയും അനുഷ്ഠാനങ്ങളിലൂടെയും മാത്രമേ ആ ശക്തിയെ തിരിച്ചറിയാനാകൂ എന്ന വ്യക്തമായ സന്ദേശം ഉള്‍ക്കൊള്ളുന്ന ഒരു ആശയമാണ് ഈ തീര്‍ഥാടന കേന്ദ്രം എന്ന് ഞാന്‍ വിശ്വസിക്കുന്നു. വിശ്വാസങ്ങളെ എതിര്‍ക്കുന്ന ഓരോ യുക്തിവാദിയും എത്തിച്ചേരുന്നതും ഈ ഒരു ആശയത്തിലാണ് എന്നത് പരമാര്‍ഥമായ ഒരു വിരോധാഭാസം തന്നെയാണ്.

ഈ ദുരന്തം ഒരു സുവര്‍ണാവസരമായി കണക്കിലെടുത്ത് ലോകത്തോട്‌ മുഴുവന്‍ മകരവിളക്ക് മനുഷ്യന്‍ കത്തിക്കുന്നതാണ് എന്ന് വിളിച്ചു പറയാന്‍ നിലവിളിക്കുന്ന ഒരു പ്രബുദ്ധ മലയാളിയെ കണ്ടതിന്റെ സന്തോഷം ഞാന്‍ മറച്ചു വയ്ക്കുന്നില്ല. ഇന്റര്‍നെറ്റ്‌ ആക്സസ് ഇല്ലാത്തവര്‍ക്ക് വേണ്ടി ടീവിയില്‍ പറയാം, ടീവി ഇല്ലാത്തവര്‍ക്ക് വേണ്ടി റേഡിയോയില്‍ പറയാം , അതും ഇല്ലാത്ത കുഗ്രാമങ്ങളില്‍ കോളാമ്പി മൈക്കിലൂടെ പറയാം എന്നൊക്കെ സജഷന്‍സ് വരുന്നതും കണ്ടു.

അവരോടൊക്കെ ഒരു വാക്ക് , ശബരിമലയിലേക്ക് വരുന്ന എല്ലാ വഴികളിലും എല്ലാ ഭാഷകളിലും ഈ അറിയിപ്പ് കൊടുത്താല്‍ പോലും വരുന്നവര്‍ തിരിച്ചു പോകും എന്ന് കരുതുന്നുണ്ടോ ? ഒരു ചുക്കും സംഭവിക്കില്ല.. ആരു വിളക്ക് കത്തിച്ചാലും ഇല്ലെങ്കിലും ഏതു നക്ഷത്രം തെളിഞ്ഞാലും ഇല്ലെങ്കിലും അവിടെ തിരക്ക് ഒരിക്കലും കുറയാന്‍ പോകുന്നില്ല.. അത് കൊണ്ടു ദയവു ചെയ്തു കലക്കവെള്ളത്തില്‍ മീന്‍ പിടിക്കുന്ന ഈ തേര്‍ഡ് റേറ്റ് ഗിമ്മിക്കുകള്‍ നിങ്ങള്‍ രാഷ്ട്രീയത്തില്‍ പ്രവേശിക്കുമ്പോള്‍ ഉപയോഗിക്കാന്‍ വേണ്ടി സൂക്ഷിച്ചു വയ്ക്കുക..അവിടെ മാത്രമാണ് നിങ്ങളുടെ ഭാവി..

ശബരിമല നട വര്‍ഷത്തില്‍ എല്ലാ ദിവസവും തുറക്കാനും , മകരവിളക്ക്‌ എന്ന ദീപാരാധന എല്ലാ ദിവസവും തെളിയിക്കാനുമുള്ള നടപടികള്‍ സാക്ഷാല്‍ ശ്രീധര്‍മശാസ്താവ് തന്നെ മുന്‍കൈയെടുത്ത് നടത്തിക്കൊടുക്കട്ടെ എന്ന് പ്രാര്‍ഥിച്ചു കൊണ്ടു നിര്‍ത്തുന്നു !

ഇന്ത്യയുടെ ദുര്‍ 'വിധി'

2010-09-21T11:42:00.000-07:00

ശരിക്കും ഭയമാകുന്നു .. ആറു പതിറ്റാണ്ട് കാലമായി നടക്കുന്ന അയോധ്യ രാമജന്മഭൂമി കേസ് ഈ വെള്ളിയാഴ്ച വിധി പറയാന്‍ പോകുന്നു പോലും.

ഹൈക്കോടതി വിധി എന്തായാലും തന്നെ സുപ്രീം കോടതിയില്‍ പോകുന്നതാണ് എന്ന് എല്ലാ രാഷ്ട്രീയ/മത നേതാക്കന്മാര്‍ പ്രഖ്യാപിച്ചു കഴിഞ്ഞു.

കാര്യം അതല്ല .

വിധി അനുകൂലമായാലും പ്രതികൂലമായാലും 'സംയമനം പാലിക്കണം' , 'കലാപം ഉണ്ടാക്കരുത്' എന്ന് പ്രഖ്യാപിക്കാന്‍ തിടുക്കം കൂട്ടുന്ന നേതാക്കളെ കാണുമ്പോഴാണ് ശരിക്കും ഭയം തോന്നുന്നത് . പരസ്യമായി , എന്നാല്‍ വ്യംഗ്യമായി, ഒരു കലാപത്തിനുള്ള ആഹ്വാനം ആണോ ഇവരുടെ ഈ മുന്‍‌കൂര്‍ ജാമ്യമെടുക്കല്‍ എന്ന് തോന്നിപ്പോകുന്നു.

ജാനാധിപത്യവിശ്വാസി എന്ന കള്ള ലേബലില്‍ എന്ത് പോക്ക്രിത്തരവും കാണിച്ചു കൂട്ടുന്ന നേതാക്കന്മാരുടെ ഭാഷ കടമെടുത്തു പറഞ്ഞാല്‍ , 'നിയമവും കേസും അതിന്റെ വഴിക്ക് പോകട്ടെ'. പക്ഷെ സ്വതന്ത്ര ഇന്ത്യയുടെ ചരിത്രത്തിലെ കറുത്ത അദ്ധ്യായം തന്നെയാണ് ബാബറി മസ്ജിദ് തകര്‍ക്കപ്പെട്ട സംഭവം എന്ന് ഞാന്‍ വിശ്വസിക്കുന്നു..

പതിനായിരം വര്‍ഷത്തെ ചരിത്രത്തില്‍ ഒരിക്കല്‍ പോലും മറ്റൊരു രാജ്യത്തെയും ആക്രമിക്കാത്ത വെറും പാവം ഭാരതത്തെ പതിനാറാം നൂറ്റാണ്ടില്‍ ആക്രമിച്ചു കീഴടക്കിയ മുസല്‍മാനായ രാജാവ് ചെയ്തു എന്ന് പറയപ്പെടുന്ന തെറ്റിന് സ്വതന്ത്ര ഇന്ത്യ അര്‍ഹിക്കുന്നതിലധികം അനുഭവിച്ചു കഴിഞ്ഞു. പക്ഷെ എന്നിട്ടും രക്തദാഹികളായ രാഷ്ട്രീയ മേലാളന്മാര്‍ക്ക് മതിയായിട്ടില്ല എന്നതിന്റെ തെളിവാണ് ബാബറി മസ്ജിദ് തകര്‍ക്കപ്പെട്ട സംഭവം.

പതിനായിരം വര്‍ഷത്തെ ചരിത്രം പോലും..!! ഇന്ത്യ എന്ന രാജ്യം ജനിച്ചിട്ട് വെറും അറുപത്തി മൂന്നു വര്‍ഷമേ ആയിട്ടുള്ളൂ. അതിനു മുന്നേ ഈ രാജ്യം ഇപ്പോള്‍ നിലനില്‍ക്കുന്ന പ്രദേശത്ത് പലതും , പല തെറ്റുകളും ശരികളും ഒക്കെ സംഭവിച്ചിട്ടുണ്ടാവാം. അതെല്ലാം തിരുത്താന്‍ ഇതാണോ മാര്‍ഗം ?

രണ്ടായിരത്തി അഞ്ഞൂറ് വര്‍ഷം മുന്‍പ് ഉണ്ടായിരുന്ന മഗധരാജ്യം ഇന്നത്തെ ബീഹാറും ബംഗാളും ചേര്‍ന്ന ഒരു ചെറിയ പ്രദേശം മാത്രമായിരുന്നു.. അതിനു ഇരുന്നൂറു വര്‍ഷങ്ങള്‍ക്കു ശേഷം ചന്ദ്രഗുപ്തമൌര്യന്‍ എന്ന ചക്രവര്‍ത്തി സാമ്രാജ്യങ്ങള്‍ കീഴടക്കി മുന്നേറുകയും ഇന്നത്തെ അഫ്ഘാനിസ്ഥാനും അപ്പുറം വരെ വെട്ടിപ്പിടിക്കുകയും ചെയ്തിട്ടുണ്ട് . അതില്‍ അലക്സാണ്ടര്‍ ചക്രവര്‍ത്തിയുടെ സാമ്രാജ്യത്തിന്റെ ഭാഗങ്ങളും ഉള്‍പ്പെടുന്നു എന്നതാണ് ചരിത്രം.

സ്വതന്ത്ര ഇന്ത്യയുടെ എല്ലാ ദേശീയ ചിഹ്നങ്ങളിലും നിറഞ്ഞു നില്‍ക്കുന്ന പേരായ അശോക ചക്രവര്‍ത്തിയാണ് അതിനു ശേഷം ലോകം കണ്ട ഏറ്റവും വലിയ അധിനിവേശം നടത്തിയിട്ടുള്ളത്. ബി.സി ഇരുനൂറുകളില്‍ അശോക ചക്രവര്‍ത്തിയുടെ സാമ്രാജ്യത്തില്‍ ഇന്നത്തെ ഇന്ത്യക്ക് പുറമേ പേര്‍ഷ്യ, മേസോപെടോമിയ , അഫ്ഘാനിസ്ഥാന്‍ , ബംഗ്ലാദേശ്/ബര്‍മ എന്നീ പ്രദേശങ്ങളും ഉള്‍പ്പെട്ടിരുന്നു. സാമ്രാജ്യങ്ങള്‍ വെട്ടിപ്പിടിച്ചു മുന്നേറിയ ഈ മൌര്യ ചക്രവര്‍ത്തിമാര്‍ ഏതെല്ലാം സംസ്ക്കാരങ്ങളും വിശ്വാസങ്ങളും എന്നേക്കുമായി ഇല്ലാതാക്കിക്കാണും? അതൊക്കെ തിരികെ ചോദിച്ചു ആരൊക്കെ വരുമോ എന്തോ !

ചരിത്രം ആവര്‍ത്തിച്ചു കൊണ്ടിരുന്നു. പക്ഷെ ഇത്തവണ പണി തിരിച്ചു കിട്ടി . പതിനാറാം നൂറ്റാണ്ടില്‍ അന്നത്തെ ഭാരതത്തിലേയ്ക്ക് പടയോട്ടം നടത്തിയ ബാബര്‍ ഒട്ടനവധി ഹൈന്ദവ ക്ഷേത്രങ്ങള്‍ നശിപ്പിക്കുകയും മുഗള്‍ സാമ്രാജ്യം സ്ഥാപിക്കുകയും ചെയ്തു. ശ്രീരാമന്റെ ജന്മസ്ഥലം ആയിരുന്നു എന്ന് വിശ്വസിക്കപ്പെടുന്ന അയോധ്യയിലെ രാമക്ഷേത്രവും ബാബര്‍ തകര്‍ത്ത ക്ഷേത്രങ്ങളില്‍ ഉള്‍പ്പെടുന്നു എന്നത് സ്വതന്ത്ര ഇന്ത്യയെ തീരാദുരിതത്തിലേയ്ക്ക് നയിക്കാന്‍ മാത്രം ഒരു കാരണം ആണെന്ന് ഞാന്‍ വിശ്വസിക്കുന്നില്ല...

ഇതൊന്നും സംഭവിച്ചത് ഇന്ത്യയിലല്ല എന്ന നഗ്നസത്യം മനസ്സിലാക്കാന്‍ മാത്രം വിവരം കെട്ട ഒരു ജനത ആണല്ലോ ഈ രാജ്യത്തിന് പിറന്നത് എന്നോര്‍ത്തു മാത്രമാണ് ദുഃഖം. ചരിത്രം തേടി നൂറ്റാണ്ടുകളും സഹസ്രാബ്ദങ്ങളും പിന്നോട്ട് പോയാല്‍ പല കഥകളും , കെട്ടുകഥകളും ലഭിക്കും. അന്നു സംഭവിച്ച എല്ലാ കാര്യങ്ങള്‍ക്കും പകരം ചോദിക്കാനും പ്രതികാരം ചെയ്യാനും തുടങ്ങിയാല്‍ ഇത് എവിടെയും അവസാനിക്കാന്‍ പോകുന്നില്ല എന്ന വസ്തുത മനസ്സിലാക്കാന്‍ ഇവിടെ ആര്‍ക്കും പറ്റുന്നില്ല എന്നത് തീര്‍ത്തും ലജ്ജാകരമാണ്.

ഇന്ത്യക്ക് സ്വാതന്ത്ര്യം ലഭിച്ച അന്ന് ഈ രാജ്യത്ത് നിലനിന്നിരുന്ന എല്ലാം അതുപോലെ സംരക്ഷിക്കുവാന്‍ അതാതു കാലത്തെ സര്‍ക്കാരുകള്‍ ചങ്കൂറ്റം കാണിച്ചിരുന്നെങ്കില്‍ ഇന്ന് ലോകത്തിന്റെ മുന്നില്‍ നമുക്ക് തലയുയര്‍ത്തി നില്‍ക്കാമായിരുന്നു. ഈ രാജ്യത്തെ തകര്‍ക്കാനുള്ള ഗൂഡശ്രമവുമായി നടക്കുന്ന ബാഹ്യശക്തികള്‍ക്ക് ബാബറി മസ്ജിദ് എന്ന ഒരു ആയുധം കൊടുക്കേണ്ടി വരില്ലായിരുന്നു..

പക്ഷെ അവിടെയും വോട്ടുബാങ്ക് രാഷ്ട്രീയം വിജയിച്ചു. വര്‍ഗീയവിദ്വേഷം എന്ന വിഷം ഈ ജനതയുടെ മേല്‍ കുത്തിവയ്ക്കുന്നതില്‍ അവര്‍ വിജയിച്ചു..

ബാബറി മസ്ജിദ് എന്ന പള്ളി തകര്‍ത്തത് ആരായാലും , രാമക്ഷേത്രം തകര്‍ത്തു പള്ളി പണിത ക്രൂരനായ ആ ഭരണാധികാരിയും അവരും തമ്മില്‍ കാലത്തിന്റെ ഒരു വ്യത്യാസം മാത്രമേ ഞാന്‍ കാണുന്നുള്ളൂ.. അടുത്ത അഞ്ഞൂറ് വര്‍ഷം പിന്നിടാന്‍ ഈ രാജ്യത്തിന് ഭാഗ്യമുണ്ടെങ്കില്‍ അന്നത്തെ ചരിത്രത്തില്‍ ഈ പള്ളി തകര്‍ത്തവര്‍ മറ്റൊരു ബാബര്‍ ആയി മാറും.തീര്‍ച്ച !

ആയിരക്കണക്കിന് നിരപരാധികളുടെ ചോര കൊണ്ടു വില പേശി ഈ ഭൂമി ആരു നേടിയാലും, അവിടെ അമ്പലമോ പള്ളിയോ പണിതാലും , ഒരു കാര്യം ഉറപ്പാണ്. ആ ദേവാലയത്തില്‍ ഈശ്വരസാന്നിധ്യം ഉണ്ടാകില്ല. ഈശ്വരന്‍ വസിക്കുന്നത് സ്വര്‍ണമാളികയിലും മാര്‍ബിള്‍ കൊട്ടാരത്തിലും ആണെന്ന് വിശ്വസിക്കുന്ന വര്‍ഗീയ ഭ്രാന്തന്മാരുടെ ഈ രാജ്യത്തു നിന്നും അവസാന രാഷ്ട്രീയക്കാരനെ നാട് കടത്തുന്ന കാലം വരെ ഇവിടം കത്തിയെരിയുകയും ചെയ്യും.

ബാബര്‍ തകര്‍ത്തത് ഈ ക്ഷേത്രം മാത്രമല്ല എന്നതാണ് ഭയപ്പെടുത്തുന്ന മറ്റൊരു കാര്യം. ഇതിന്റെ കാര്യം ഒരു തീരുമാനത്തിലെത്തിച്ചു കഴിഞ്ഞാല്‍ പിന്നെ ദൈവത്തെ സേവിക്കുന്നവര്‍ എന്ന പേരില്‍ അഴിഞ്ഞാടുന്ന ഭ്രാന്തന്മാര്‍ അടുത്ത സ്ഥലം തേടിപ്പോകും.. അങ്ങനെ ഈ രാജ്യം അവര്‍ കഷ്ണം കഷ്ണമായി വെട്ടിനുറുക്കും.

അതിലും ഭേദം പാകിസ്താനോ ചൈനയോ ഒരു അണുബോംബിട്ട് ഒറ്റയടിക്ക് ഇതങ്ങട് തീര്‍ക്കുന്നതായിരുന്നു !!

(അറുപതു വര്‍ഷമായി അയോധ്യ കേസ് തുടങ്ങിയിട്ട് .. പക്ഷെ , ഇന്ത്യയില്‍ കോമണ്‍വെല്‍ത്ത് ഗെയിംസ് , അഥവാ പൊതുസ്വത്തു കൊണ്ടു കളിക്കല്‍ എന്ന ഈ സംഭവം തുടങ്ങാന്‍ പോകുന്നതിനു തൊട്ടു മുന്നേ മാത്രമേ ഇവന്മാര്‍ക്ക് വിധി പറയാന്‍ തോന്നിയുള്ളൂ എന്നതാണ് ഏറ്റവും കഷ്ടം. പക്ഷെ ഈ കളിക്കല്‍ പൊളിയാന്‍ കലാപമോ വെടിവയ്പ്പോ ഭീകരാക്രമണമോ ഒന്നും വേണ്ട. ഒരു സ്റ്റേഡിയത്തിലേയ്ക്ക് പോകുന്ന പാലം ഇന്ന് വൈകുന്നേരം തകര്‍ന്നു വീണു കഴിഞ്ഞു.. ബാക്കിയൊക്കെ വീഴാന്‍ ഇനിയും എട്ടു പത്ത് ദിവസം ഉണ്ടല്ലോ)

ഇതില്‍ ഏതാണ് മനസിലാവാത്തത് ?

2010-06-29T10:03:00.000-07:00

ഇന്ധനവില നിര്‍ണയിക്കാനുള്ള അവകാശം എണ്ണക്കമ്പനികള്‍ക്ക് തീറെഴുതി കൊടുത്തത് എന്തിനാണെന്ന് മനസിലാകാത്ത ഈ നാട്ടിലെ കഴുതകള്‍ക്ക് കേരളത്തിലെ ഒരു പ്രതിപക്ഷപുംഗവന്‍ ഇന്നലെ സംഭവം വിശദീകരിച്ചു കൊടുക്കുന്നത് കേള്‍ക്കാനിടയായി..

അദ്ദേഹം പറഞ്ഞ പ്വായന്റ്റ് ഇതാണ്.. റിലയന്‍സ് , ഷെല്‍ , ബിപി മുതലായ കമ്പനികള്‍ അന്താരാഷ്‌ട്ര വിലവ്യതിയാനത്തിനനുസരിച്ചു ഇന്ത്യയിലെ വില നിര്‍ണയിക്കുമ്പോള്‍ അവര്‍ തമ്മില്‍ കടുത്ത (എന്ന് പറഞ്ഞാല്‍ , പിടിച്ചാല്‍ കിട്ടാത്ത രീതിയില്‍ , അതിഭീകരമായ) ഒരു മത്സരം ഉടലെടുക്കും.. അതിന്റെ ഫലമായി പരസ്പ്പരം വില കുറച്ചു വില കുറച്ചു അവസാനം വിയര്‍ത്തു കുളിച്ചു ഒരു പരുവത്തിലാകുന്ന കമ്പനികള്‍ ഇപ്പോള്‍ ഉള്ള വിലയുടെ നാലിലൊന്ന് വിലയ്ക്ക് ഇവിടെ പെട്രോള്‍ ഒഴുക്കും.. വണ്ടി ഓടിക്കാനും , വേണമെങ്കില്‍ വണ്ടി കഴുകാനും വരെ പെട്രോള്‍ സുലഭം !!

ഈ സത്യം അറിയാന്‍ വൈകിയത് കൊണ്ടു കഴിഞ്ഞ ആഴ്ച വെറുതെ ഒരു ഹര്‍ത്താല്‍ നടത്തിയല്ലോ എന്നോര്‍ത്ത് ദുഖിക്കാന്‍ വരട്ടെ.. കഴിഞ്ഞ ആഴ്ച നടത്തിയ ഹര്‍ത്താല്‍ വെറും ഒരു ഹര്‍ത്താല്‍ അല്ല .. പ്രബുദ്ധ കേരളത്തിന്റെ ഉയര്‍ത്തെഴുന്നേല്‍പ്പായിരുന്നു ! ഇത് മനസ്സിലാക്കിത്തന്നത് വേറൊരു ടീമാണ് ..

" തുടര്‍ച്ചയായി രണ്ടു ഹര്‍ത്താലുകള്‍ നടത്താന്‍ പ്രാപ്തരാണ് കേരളത്തിലെ ജനങ്ങള്‍ " എന്ന് പറഞ്ഞിരിക്കുന്നത് പോളിറ്റ് ബ്യൂറോ മെമ്പറും , സിഐടിയു എന്തിരോ എന്തോയുമൊക്കെ ആയ എം കെ പാന്ഥെ ആണ് !

കണ്ടോ കണ്ടോ .. ആനയ്ക്ക് സ്വന്തം ശക്തി അറിയില്ല എന്ന് പറയുമ്പോലെയാണ് മലയാളിയുടെ കാര്യം.. നമ്മുടെ ശക്തി നമുക്കറിയില്ല .. തുടര്‍ച്ചയായി രണ്ടോ മൂന്നോ പത്തോ ഹര്‍ത്താലുകള്‍ നടത്താന്‍ പ്രാപ്തരായ ജനങ്ങള്‍ ലോകത്ത് വേറെ എവിടെയെങ്കിലും ഉണ്ടാകുമോ എന്തോ ? എന്തായാലും ഒടുവില്‍ മലയാളിയെ ഈ കാര്യം പറഞ്ഞു മനസ്സിലാക്കാന്‍ ഒരു ഉത്തരേന്ത്യക്കാരന്‍ തന്നെ വേണ്ടി വന്നു !

സ്വന്തം ശക്തി മറന്നു പോയിട്ട് ഉറക്കം തൂങ്ങിയിരുന്ന ഹനുമാനെ ആരോ വിളിച്ചു എഴുന്നേല്‍പ്പിച്ചു പുള്ളീടെ ശക്തിയൊക്കെ പറഞ്ഞു കൊടുത്തു കലിപ്പാക്കി.. അതോടു കൂടി ലങ്ക പൊകയായി.. അത് പോലെ തന്നെ, അടുത്ത ഹര്‍ത്താല്‍ പടിവാതുക്കല്‍ എത്തിയിട്ടും സ്വന്തം ശക്തി അറിയാതെ ഉറങ്ങിക്കിടന്ന മലയാളി ഇതാ ഉണര്‍ന്നു കഴിഞ്ഞു.... അല്ല ... പാന്ഥെ സാര്‍ ഉണര്‍ത്തി !

ഇനി നോക്കിക്കോ.. ഈ ഹര്‍ത്താല്‍ ഞങ്ങ പൊടി പൊടിക്കും .. ജയ് പാന്ഥെ , ജയ് ശങ്കര്‍ റെഡി (ബിവറേജസ് എംഡി )

ഇനി അല്‍പ്പം കാര്യം.. മനുഷ്യര്‍ക്ക്‌ ഇതാ ഒരു സന്തോഷവാര്‍ത്ത..

ക്യാന്‍സര്‍ മാറാനുള്ള മരുന്ന് കണ്ടു പിടിച്ചു .. ആസ് യൂഷ്വല്‍ , അമേരിക്കക്കാര്‍ തന്നെ ഈ പിടുത്തവും നടത്തിയിരിക്കുന്നത്.. അവരത് ചുമ്മാ കണ്ട ചെമ്മാനും ചെരുപ്പുകുത്തിക്കും ഒന്നും കൊടുക്കില്ല.. ആരോഗ്യ പരിപാലന രംഗത്ത് ഇന്ത്യയില്‍ ഒന്നാം സ്ഥാനത്തുള്ള കേരളത്തിന്റെ ആരോഗ്യ മന്ത്രി നേരിട്ട് ചെന്നാലേ അത് കൊടുക്കുള്ളൂ എന്ന് തീര്‍ത്തു പറഞ്ഞു .. കേട്ട പാതി നമ്മുടെ മന്ത്രി അങ്ങോട്ട് കുതിച്ചിട്ടുണ്ട്.. ഭാഗ്യമുണ്ടെങ്കില്‍ മരുന്നിന്റെ കൂടെ എന്തെങ്കിലും ഏര്‍ളി ബേര്‍ഡ് സമ്മാനങ്ങളും നമുക്ക് കിട്ടുന്നതാണ്..

(കാനഡയില്‍ നിന്നും കേരളത്തിന്റെ വടക്കേ അറ്റത്തുള്ള ഏതോ ഒരു ആശുപത്രിയിലേയ്ക്ക് പണ്ട് ഇതേ ക്യാന്‍സറിനു എന്തോ ഒരു 'മരുന്ന്' കിട്ടിയതിന്റെ ക്ഷീണം മാറി വരുന്നതേയുള്ളൂ. ഇനി ഇതും കൂടി ആയാല്‍ എന്താകുമോ എന്തോ..)

നമ്മടടുത്താ കുട്ടീം കോലും കളി

2010-04-24T11:47:00.000-07:00

ഐ പി എല്‍ വിവാദം എന്തായി എന്നൊന്നും ശ്രദ്ധിക്കാന്‍ തീരെ താല്‍പ്പര്യമില്ല .. എന്നാലും ശശി തരൂര്‍ പടിയിറങ്ങാന്‍ ഇത്രയും വൈകിയത് നമ്മുടെ നാട്ടിലെ രാഷ്ട്രീയ മേലാളന്മാരുടെ പിടിപ്പുകേടു തന്നെ എന്ന് പറയാന്‍ വേണ്ടി മാത്രം എഴുതുവാണ്...

ഒന്നാമത് , വിവരവും വിദ്യാഭ്യാസവും ഉള്ളവര്‍ക്ക് പറഞ്ഞിട്ടുള്ളതല്ല രാഷ്ട്രീയം.. അതറിഞ്ഞിട്ടും കയ്യിലുള്ള നല്ല ജോലി ഒക്കെ കളഞ്ഞു കുളിച്ച് അങ്ങേരു ഇവിടെ വന്നു.. എട്ടാം ക്ലാസ്സും ഗുസ്തിയും മാത്രമാണ് രാഷ്ട്രീയ പ്രവേശനത്തിനുള്ള മാനദണ്ഡം എന്ന് ഈ മഹാരാജ്യത്തെ പട്ടിക്കും പൂച്ചയ്ക്കും വരെ അറിയാം..

ആ സ്ഥിതിക്ക് , ഇതൊന്നുമല്ലാത്ത തരൂര്‍ രാഷ്ട്രീയത്തില്‍ പ്രവേശിച്ചപ്പോള്‍ തന്നെ , ശശിക്ക് എന്ത് രാഷ്ട്രീയ പാരമ്പര്യം ഉണ്ടെന്നു പല കാര്‍ന്നോന്മാരും ചോദിച്ചത് എത്ര അര്‍ത്ഥവത്താണ് എന്ന് ഇപ്പോള്‍ തോന്നുന്നു .. അങ്ങേരോ , അങ്ങേരുടെ അപ്പനപ്പൂപ്പന്മാരോ ആരെങ്കിലും ജീവിതത്തില്‍ ഇത് വരെ ഏതെങ്കിലും ഖജനാവില്‍ കയ്യിട്ടു വാരിയിട്ടുണ്ടോ ? ഖദര്‍ ധരിച്ചിട്ടുണ്ടോ ? ഗ്രൂപ്പ് വഴക്കുണ്ടാക്കിയിട്ടുണ്ടോ ? ബീഡിയും പരിപ്പുവടയും തിന്നിട്ടുണ്ടോ ? തിരുവനന്തപുരത്തെ ഏതെങ്കിലും ചായക്കടയില്‍ പോയിട്ടുട്ണോ ? ഏതെങ്കിലും മരണവീട്ടില്‍ അനുശോചനം അറിയിച്ചിട്ടുണ്ടോ ?

ഇതൊക്കെ പോട്ടെ , പാവം അനുയായികളെ ഏതെങ്കിലും പോലീസ് സ്റ്റേഷനില്‍ തള്ളിക്കയറി മോചിപ്പിച്ചിട്ടുണ്ടോ ?

ഒന്നുമില്ല.. ഒരു ചുക്കും ചെയ്തിട്ടില്ല .. എന്നിട്ടാണ് മന്ത്രി ആവാന്‍ കെട്ടിയെടുത്തത് .

മന്ത്രി ആയതില്‍ പിന്നെ പോരായ്മകള്‍ വര്‍ദ്ധിച്ചു .. സ്വന്തം ചിലവില്‍ സ്റ്റാര്‍ ഹോട്ടലില്‍ താമസിക്കുന്നു എന്നതിലപ്പുറം ഇന്ത്യന്‍ രാഷ്ട്രീയത്തിന് നാണക്കേടായി വേറെ എന്തുണ്ട് ? ഖജനാവിലെ പണം പിന്നെ എന്തിനാ ?? അതും പോരാഞ്ഞിട്ട് നന്നായി ഇംഗ്ലീഷ് സംസാരിക്കുന്നു..ഇന്റര്‍നെറ്റ്‌ ഉപയോഗിക്കുന്നു.. നല്ല ആശയങ്ങള്‍ ജനങ്ങളുമായി പങ്കുവയ്ക്കുന്നു.. കഴുതകളായ ജനങ്ങളുമായി പങ്കു വയ്ക്കാനുള്ളതാണോ ആഭ്യന്തര രഹസ്യങ്ങള്‍ ? .. വിദേശകാര്യ മന്ത്രി എന്ന് പറഞ്ഞിട്ട് തിരുവിതാംകൂറിന്റെ അയല്‍രാജ്യങ്ങളായ കൊച്ചിയിലും മലബാറിലും പോകാതെ സായിപ്പിന്റെ നാട്ടില്‍ ഡാന്‍സ് കാണാനും കാപ്പിരിയുടെ നാട്ടില്‍ ഭൂകമ്പം കാണാനും പോകുന്നു ! എവിടെയെങ്കിലും കേട്ടിട്ടുണ്ടോ ഇതൊക്കെ ?

ഭാരതം എന്ന മഹാരാജ്യത്ത് പത്ത് വര്‍ഷം ക്രിക്കറ്റ് കളിപ്പിച്ചു എഴുപതു കോടി ഉണ്ടാക്കുന്നവന്‍ ഒക്കെ രാഷ്ട്രീയക്കാര്‍ക്ക് അപമാനമാണ്. ഇവിടെ ഒരൊറ്റ സിറ്റിങ്ങില്‍ കാലിത്തീറ്റയില്‍ കയ്യിട്ടു വാരിയോ , മരം മുറിച്ചു പ്രതിമകള്‍ ഉണ്ടാക്കിയോ മറ്റോ ആയിരക്കണക്കിന് കോടികള്‍ ഉണ്ടാക്കാത്തവന്‍ വെറും വെയ്സ്റ്റ് ആണ്. ഇതൊന്നും അറിയാതെയാണ് ശശി തരൂര്‍ ഇങ്ങോട്ട് കാലെടുത്തു വച്ചത് .. കന്നുകാലികളെ കന്നുകാലികള്‍ എന്ന് വിളിച്ചു.. അങ്ങനെ ചെയ്യാന്‍ പാടുണ്ടോ ? ജനങ്ങളെ കന്നുകാലികളെപ്പോലെ ജീവിപ്പിക്കണം, പക്ഷെ അങ്ങനെ വിളിക്കരുത് .. വിളിച്ചാല്‍ അത് തെറ്റാണ് !

ഗാന്ധി ജയന്തിക്കു അവധി വേണ്ട എന്ന് പോലും .. ഗാന്ധിജിയുടെ പടം അച്ചടിച്ച നോട്ടു കഷ്ട്ടപ്പെട്ടുണ്ടാക്കി തലേ ദിവസം തന്നെ ക്യൂ നിന്നു മദ്യം വാങ്ങി പിറ്റേ ദിവസം അത് കുടിച്ചു ഗാന്ധിയുടെ പിറന്നാള്‍ ആഘോഷിക്കുന്നതില്‍ നിന്നും ഒരു ഇന്ത്യന്‍ പൌരനെ വിലക്കാന്‍ ഇയാള്‍ക്കെന്തു അധികാരം ? അതും തെറ്റ് !

അവസാനം ഇതാ ഐ പി എല്‍ വിവാദം.. ലാലൂ പ്രസാദ് യാദവ് പോലും ഈ ചക്കരക്കുടം നോക്കി വെറുതെ വെള്ളമിറക്കി ഇരിക്കുമ്പോള്‍ ഇന്നലെ വന്ന തരൂര്‍ അതില്‍ നിന്നും ഒരു ഓലപ്പീപ്പി വാങ്ങാനുള്ള കാശെടുത്താലും അത് പ്രബുദ്ധരായ ഞങ്ങള്‍ അനുവദിക്കില്ല..

അത് കൊണ്ട് .. തരൂര്‍ വണ്ടി വിട്ടോളുക... ഇതൊക്കെ നോക്കാനും കയ്യിട്ടു വാരാനും ഒക്കെ ഇവിടെ വേറെ ആമ്പിള്ളേരുണ്ട് (പെണ്‍പിള്ളേരും )

ഒരു കാര്യത്തില്‍ മലയാളികള്‍ക്ക് അഭിമാനിക്കാം.. സഹസ്രകോടിക്കണക്കിനു കറുത്ത പണം വെളുത്ത പണമാക്കി മാറ്റിക്കൊണ്ട് സ്വച്ചന്ദം വിരാജിച്ചിരുന്ന ഐ പി എല്‍ എന്ന മഹാപ്രസ്ഥാനത്തില്‍ ഒരു മലയാളി തല വച്ചതും , ദാ നില അമിട്ട് പൊട്ടും പോലെ സംഭവം പൊട്ടിത്തകര്‍ന്നു .. അതാണ്‌ മലയാളിയുടെ മിടുക്ക്..

നമ്മടടുത്താ കുട്ടീം കോലും കളി !!

വീണ്ടും ഒരു ലൈവ് മാധ്യമ ആഘോഷം

2010-03-24T01:35:00.000-07:00

ഇന്ത്യാവിഷം ചാനലില്‍ ഇന്നലെ ബസ്‌ ദുരന്തം ആഘോഷമാക്കിയെടുത്ത് നഘേഷ് കുമാര്‍ ആര്‍മാദിച്ചു

മന്ത്രിയോട് ചോദിച്ച ചോദ്യങ്ങള്‍ ഇതൊക്കെ ആയിരുന്നു

1 ) എന്ത് കൊണ്ട് ആദ്യം വന്ന ക്രെയ്ന്‍ കൊണ്ട് ബസ്സ്‌ പോക്കിയെടുത്തില്ല ?
2 ) ആദ്യ അഞ്ചു മിനുട്ടില്‍ അവിടെ പോലീസോ മന്ത്രിമാരോ ആരും എത്താഞ്ഞത് എന്ത് കൊണ്ട് ?
3 ) നാവിക സേനയുടെ ഹെലികോപ്ടര്‍ ഉപയോഗിച് വളരെ ഈസിയായി ബസ്‌ പോക്കിയെടുതിരുന്നെങ്കില്‍ കുറേപ്പേരെ രക്ഷിക്കാന്‍ സാധിക്കുമായിരുന്നില്ലേ ?

രക്ഷപെട്ട ബസ്‌ ജീവനക്കാരനെയും പുള്ളി വെറുതെ വിട്ടില്ല

1 ) താങ്കള്‍ ഒഴുകി എത്തി രക്ഷപെട്ട ജനലിലൂടെ എന്ത് കൊണ്ട് മറ്റുള്ളവര്‍ രക്ഷപ്പെട്ടില്ല ?
2 ) പോസ്റ്റില്‍ ഇടിച്ച ബസ്സ്‌ എന്ത് കൊണ്ട് നിന്നില്ല ?
3 ) രക്ഷാപ്രവര്‍ത്തനം വൈകിയതിനാല്‍ അല്ലേ ഇത്രെയും പേര്‍ മരിക്കാന്‍ ഇടയായത് ?

അല്‍പ്പം വിവരമുള്ള ആ ബസ്സ്‌ ജീവനക്കാരന്‍ ഒടുവില്‍ പറഞ്ഞു - "ഞാന്‍ വെള്ളത്തില്‍ നിന്നും പൊങ്ങി വന്നത് ഒരു മിനുട്ടോളം കഴിഞ്ഞിട്ടാണ്.. അതില്‍ കൂടുതല്‍ നേരം ഒരു മനുഷ്യന് വെള്ളത്തിനടിയില്‍ ജീവനോടെ ഇരിക്കാന്‍ കഴിയുമെന്ന് തോന്നുന്നില്ല.. പിന്നെ ഏതു രക്ഷാപ്രവര്ത്തകന്‍ വന്നാലും ഡെഡ്ബോഡി റിക്കവര്‍ ചെയ്യാന്‍ മാത്രമേ സാധിക്കൂ എന്നാണു എനിക്ക് തോന്നുന്നത് " എന്ന്

ശരിയാണ് !

ആധുനിക ലോകത്ത് മാധ്യമങ്ങളുടെ പങ്ക് ഒട്ടും നിസാരമല്ല.. എന്നാല്‍ , വാര്‍ത്തകള്‍ സത്യസന്ധമായി ജനങ്ങളില്‍ എത്തിക്കുക എന്ന മാധ്യമധര്‍മ്മം ഒക്കെ എന്നേ നിലംപൊത്തി.. ഇന്നിവിടെ വേണ്ടത് സ്കൂപ്പ് ആണ് .. അപകടവും മരണവും ഒക്കെ ഏറ്റവും കളര്‍ഫുള്‍ ആയി ആഘോഷിക്കുന്ന ഒരു തരം ഭ്രാന്തമായ ആവേശത്തിലേക്ക് മാധ്യമങ്ങള്‍ എത്തിച്ചേര്‍ന്നിരിക്കുന്നു ! അതും പോരാഞ്ഞിട്ട് നിലവാരം കുറഞ്ഞ , ബുദ്ധിശൂന്യമായ അഭിമുഖങ്ങള്‍ നടത്തി തങ്ങളുടെ വിഡ്ഢിത്തം നാട് മുഴുവന്‍ വിളമ്പുകയും ചെയ്യുന്നു..

മലയാളികളുടെ അധപ്പതനതിന്റെ മറ്റൊരു കാഴ്ച്ച ഇന്നലെ ടീവി ദൃശ്യങ്ങളില്‍ കണ്ടു. രക്ഷാപ്രവര്‍ത്തനതിനു ഇറങ്ങുന്ന ഒരു പറ്റം ജനങ്ങള്‍ക്കിടയില്‍ കാഴ്ചക്കാരായി നോക്കിനില്‍ക്കുന്ന അമേച്വര്‍ ഫോട്ടോഗ്രാഫര്‍മാര്‍ .. കയ്യില്‍ മൊബൈലും ഏന്തി തിക്കിത്തിരക്കി ബഹളം ഉണ്ടാക്കുന്ന ഒരു സംഘം ആളുകള്‍ .

മൊബൈല്‍ ക്യാമറ കയ്യിലുണ്ടെങ്കില്‍ പിന്നെ എന്ത് മോര്‍ച്ചറി , എന്ത് ഹോട്ടല്‍ ടോയ്ലെറ്റ് .. എല്ലാം നമുക്ക് ഒരുപോലെ എന്ന് ചിന്തിക്കുന്ന സാമൂഹ്യ ഞെരമ്പ് രോഗികള്‍ !! രക്ഷാപ്രവര്‍ത്തനത്തിനു ഏറ്റവും അധികം നേരിട്ട തടസ്സവും ഈ കാഴ്ചക്കാര്‍ തന്നെയായിരുന്നു പോലും !

ആര്‍ക്കും നേരെയാക്കാന്‍ പറ്റാത്ത വിധം നമ്മള്‍ നശിച്ചു കഴിഞ്ഞു !

ദൈവത്തിനെ സ്വന്തം നാടിനെ അങ്ങേരു തന്നെ രക്ഷിക്കട്ടെ !!

ആസ് യൂഷ്വല്‍ , മനോരമ ന്യൂസ് ബാക്കി എല്ലാ ചാനലുകാരെക്കാള്‍ ഒരു പടി മുന്നിലായിരുന്നു .. മരണ സംഖ്യ കാണിക്കുന്നതില്‍ !!!

വിഘടനവാദികളും പ്രതിക്രിയാവാദികളും തമ്മില്‍ ........

2010-03-18T11:56:00.000-07:00

കമ്മ്യൂണിസ്റ്റുകാരുടെ വിവരക്കേടിനെ കുറിച്ച് ഞാന്‍ എഴുതിയിട്ട് വേണ്ട നിങ്ങള്‍ക്കൊക്കെ മനസിലാവാന്‍ എന്ന് അറിയാം.. എന്നാലും ഇതൊക്കെ കാണുമ്പോള്‍ അറിയാണ്ട് വീണ്ടും പറഞ്ഞു പോകുകയാണ്.. വേറെ എങ്ങിനെ പ്രതികരിച്ചാലും ചിലപ്പോള്‍ ഇടി കിട്ടും.. അത് കൊണ്ട് ഇവിടെ പറയാം എന്ന് വച്ചു ..

ഇന്ത്യയിലെ ഏറ്റവും വിലപിടിപ്പുള്ള ബ്രാന്‍ഡ് അംബാസിഡര്‍മാരില്‍ ഒരാളായ അമിതാബ് ബച്ചനെ നമ്മുടെ ടൂറിസം-കം-ആഭ്യന്തര മന്ത്രി, കേരള ടൂറിസത്തിന്റെ അംബാസിഡര്‍ ആക്കാന്‍ വേണ്ടി ക്ഷണിച്ചു കൊണ്ട് കത്ത് എഴുതിയതിന്റെ ഇരുപത്തിനാലാം മണിക്കൂര്‍ ആഘോഷിക്കും മുന്‍പേ തന്നെ , ഇന്ത്യ എമ്പാടും നിറഞ്ഞു കവിഞ്ഞു കിടക്കുന്ന കമ്മ്യൂണിസ്റ്റു പാര്‍ട്ടിയുടെ അഖിലേന്ത്യാ എന്തോന്നോ ആയ സീതാറാം എച്ച്(ല്‍)ഊരി പ്രസ്താവന ഇറക്കിയിരിക്കുന്നു -
ഗുജറാത്ത് മുഖ്യമന്ത്രി നരേന്ദ്ര മോഡിയെ പുകഴ്ത്തി പറഞ്ഞ അമിതാബ് അച്ചനെ കേരളത്തിന്റെ അംബാസിഡര്‍ ആക്കാന്‍ പറ്റില്ലാ എന്ന്..

വികസനം എന്ന് കേട്ടാല്‍ തന്നെ അറയ്ക്കുന്ന കമ്മ്യൂണിസ്റ്റു പാര്‍ട്ടി ഇങ്ങനെ പറഞ്ഞില്ലെങ്കില്‍ മാത്രമേ അതിശയമുള്ളൂ.. അറുപതുകളില്‍ ഇന്ത്യയുടെ സാമ്പത്തിക തലസ്ഥാനമായിരുന്ന കല്‍ക്കട്ടയെ വളരെ കഷ്ട്ടപ്പെട്ടു ബുദ്ധിമുട്ടി ഒരു ഗതിയും പരഗതിയും ഇല്ലാത്ത പ്രേത നഗരമാക്കി മാറ്റിയതില്‍ മുഴുവന്‍ പങ്കും വഹിച്ച സഖാക്കള്‍ ഇങ്ങനെ അല്ലാതെ പിന്നെ എങ്ങനെ പെരുമാറണം അല്ലേ ?

അമിതാബ് ബച്ചന്‍ ഇവിടെ എന്ത് കാണിച്ചാലും അടിസ്ഥാന സൌകര്യങ്ങള്‍ ഇല്ലാതെ ഇവിടെ ടൂറിസം വികസനം എന്ന് പറയുന്ന ഒരു സംഭവവും നടക്കില്ല .. ശരി തന്നെ .. പക്ഷെ ലോകം എമ്പാടും അറിയപ്പെടുന്ന ഒരു കലാകാരനെ ഇങ്ങനെ ഒരു ആവശ്യത്തിനു പ്രോജെക്റ്റ്‌ ചെയ്യുമ്പോള്‍ കിട്ടുന്ന ഒരു പഞ്ച് ഫലപ്രദമായി ഉപയോഗിക്കാന്‍ നമുക്ക് സാധിച്ചേനെ.. അത് കളഞ്ഞു കുളിച്ചു !

താന്‍ നരേന്ദ്ര മോഡിയുടെ വക്താവല്ല , മറിച്ച്, ഗുജറാത്ത് എന്ന സംസ്ഥാനത്തിന്റെ വളര്‍ച്ചയില്‍ സന്തോഷിക്കുന്ന ഒരാള്‍ മാത്രമാണ് എന്ന് അമിതാബ് ബച്ചന്‍ വളരെ വ്യക്തമായി പറഞ്ഞിട്ടുള്ളത് ഓര്‍ക്കുന്നു . ഒരു ഇന്ത്യന്‍ പൌരനു അത് പറയാനുള്ള സ്വാതന്ത്ര്യം ഇല്ല എന്നായിരിക്കും സഖാക്കള്‍ ഉദ്ദേശിച്ചത്.. എന്ത് കണ്ടാലും എതിര്‍ക്കാന്‍ മാത്രം ശീലിച്ചിട്ടുള്ള കമ്യൂണിസ്റ്റ് നയം !

ഇന്ത്യയില്‍ ഏറ്റവും വികസനം നടക്കുന്ന ഒരു സംസ്ഥാനത്തിലെ (കലാപങ്ങളും മറന്നിട്ടില്ല.. അത് ഈ കോണ്‍ടെക്സ്റ്റില്‍ മിക്സ് ചെയ്യേണ്ട ആവശ്യം ഉണ്ടന്ന് തോന്നുന്നില്ല) മുഖ്യമന്ത്രിയോടും അവിടുത്തെ ഭരണപക്ഷത്തോടും ഈ സഖാക്കള്‍ക്കുള്ള എതിര്‍പ്പ് മനസ്സിലാക്കാം.. പക്ഷെ കേരളം എന്ന സംസ്ഥാനത്തിന്റെ ടൂറിസം വികസനം ഈ പറയുന്ന പോളിറ്റ് ബ്യൂറോയുടെ കയ്യില്‍ എന്നാണു എല്പ്പിച്ചതെന്നു മനസിലാകുന്നില്ല.. ഇതൊരു സംസ്ഥാനമാണ് , ഇവിടെ ഒരു ഗവണ്‍മെന്റ് ഉണ്ട് (പേരിനു) .. ഇവിടുത്തെ കാര്യങ്ങള്‍ തീരുമാനിക്കേണ്ടത് അവരാണ്.. അല്ലാതെ എവിടെയോ ഇരിക്കുന്ന ബുദ്ധിജീവികള്‍ അല്ല എന്ന് നമ്മളൊക്കെ ഇനി എന്നാണോ തിരിച്ചറിയാന്‍ പോകുന്നത്..

അമിതാഭിന് കത്തെഴുതിയ ആഭ്യന്തര മന്ത്രി , യെച്ചൂരിയുടെ ഈ പ്രസ്താവന കേട്ട വഴി പ്ലേറ്റ് മറിച്ചിട്ടുണ്ട് .. അമിതാഭിന് കേരളത്തിന്റെ അംബാസിഡര്‍ ആവാനുള്ള താല്‍പ്പര്യം കണ്ടാണ്‌ അദ്ദേഹത്തെ താന്‍ ക്ഷണിച്ചതെന്നും , കേരളത്തില്‍ അപ്പോള്‍ തന്നെ അതിനെതിരെ ഒരുപാട് വിമര്‍ശനങ്ങള്‍ വന്നിരുന്നു എന്നും മന്ത്രി പറഞ്ഞു കഴിഞ്ഞു.. അപ്പോള്‍ കാണുന്നവനെ അപ്പന്‍ എന്ന് വിളിക്കുന്ന രാഷ്ട്രീയ പാപ്പരത്വം !

കേരളത്തിന്റെ ബ്രാന്‍ഡ് അംബാസിഡര്‍ ആവാനുള്ള അടക്കാനാവാത്ത ആഗ്രഹം മനസ്സില്‍ കൊണ്ടു നടന്ന അമിതാബ് ബച്ചന്‍ ഈ മന്ത്രിയോട് കരഞ്ഞു കാലു പിടിച്ചു പറഞ്ഞിട്ടും മന്ത്രി കുലുങ്ങിയില്ല എന്ന പോലെ ആയി ഇപ്പോ അവസ്ഥ !

*
ഇത്രയും വായിച്ചെങ്കില്‍ ,
ഇതൊക്കെ സഹിച്ചും ക്ഷമിച്ചും ഈ ഭ്രാന്താലയത്തില്‍ ജീവിക്കുന്ന ഒരു പാവം പൌരന്റെ ജല്‍പ്പനങ്ങള്‍ എന്ന് കരുതി എന്നോട് ക്ഷമിക്കുക..

കാഴ്ചയുള്ള അന്ധന്മാര്‍ !

2010-03-11T11:16:00.000-08:00

ശനിയാഴ്ച കുറച്ചു നേരം ഓഫീസില്‍ പോകേണ്ട ആവശ്യം ഉണ്ടായിരുന്നു.. രാവിലെ ഒരു രണ്ടു മണിക്കൂര്‍ നേരം മാത്രം..
ഇറങ്ങിയപ്പോള്‍ കണ്ണില്‍ കുത്തുന്ന വെയില്‍ !

തിരിച്ചു ഇന്‍ഫോപാര്‍ക്ക് റോഡിലൂടെ വരുമ്പോള്‍ ഒരു കാഴ്ച കണ്ടു.. രണ്ടു അന്ധന്മാര്‍ റോഡിന്‍റെ സൈഡിലൂടെ നടന്നു പോകുന്നു.. ഒരു കൈ പരസ്പരം
കോര്‍ത്ത്‌ പിടിച്ചിട്ടുണ്ട് , മറു കയ്യില്‍ വാകിംഗ് സ്റ്റിക്കും ഉണ്ട്.. ഇവിടെ ഏതോ കമ്പനിയില്‍ ജോലി ചെയ്യുന്നവരാണ് എന്ന് തോന്നുന്നു..

റോഡില്‍ നിന്നും ഇറങ്ങി ഓരം ചേര്‍ന്നാണ് അവര്‍ നടക്കുന്നത്..
കാഴ്ച ഇല്ലാത്തതിന്റെ ബുദ്ധിമുട്ടൊക്കെ ഒരു നിമിഷം ആലോചിച്ചു ഞാന്‍ അത് വഴി കടന്നു പോയി.. കുറച്ചു പോയ ശേഷം വെറുതെ ഒന്ന് റിയര്‍ വ്യൂ മിററിലൂടെ നോക്കി.

അവര്‍ ഇപ്പോള്‍ റോഡിനു അഭിമുഖമായി നില്‍ക്കുകയാണ്.. അവര്‍ നടന്നിരുന്ന വശത്ത് വെയില്‍ കൂടുതല്‍ ഉള്ളതിനാലാവാം, റോഡിന്‍റെ മറു വശത്തേക്ക് കടക്കുവാനുള്ള തയ്യാറെടുപ്പിലാണ്.. എന്തോ ഒരു കൌതുകം കൊണ്ടോ (എന്താണെന്നറിയില്ല) ഞാന്‍ വണ്ടി ഒന്ന് നിര്‍ത്തി തിരിഞ്ഞു നോക്കി..

അവര്‍ രണ്ടു പേരും ആദ്യം വടി കൊണ്ട് ടാറിട്ട റോഡില്‍ തട്ടി നോക്കുന്നു.. റോഡ്‌ തുടങ്ങുന്ന സ്ഥലം മനസിലാകാന്‍ വേണ്ടിയാവണം.. പിന്നെ വളരെ ശ്രദ്ധിച്ചു മുന്നോട്ട് നടക്കാന്‍ ശ്രമിക്കുന്നു.. ആറേഴു വാഹനങ്ങള്‍ വരുന്നുണ്ട്.. ഇവര്‍ എങ്ങനെ റോഡ്‌ മുറിച്ചു കടക്കും എന്ന് ഞാന്‍ എന്നാലോചിച്ചു..

എന്ത് പ്രശ്നം ! അവര്‍ക്കല്ലേ കാഴ്ച ഇല്ലാതെയുള്ളൂ , വരുന്നവര്‍ക്ക് കാണാലോ.. ! ശരിയാണ് .. വാഹനങ്ങള്‍ ഓടിച്ചു വരുന്നവര്‍ക്ക് ഈ രണ്ടു അന്ധന്മാര്‍ റോഡ്‌ മുറിച്ചു കടക്കാന്‍ നില്‍ക്കുന്നത് വ്യക്തമായി കാണാന്‍ സാധിക്കും.

ആശ്ച്ചര്യമെന്നു പറയട്ടെ (അങ്ങനെ തന്നെയാണോ പറയേണ്ടത് എന്നറിയില്ല), ഒരു വാഹനം പോലും നിര്‍ത്തുന്നില്ല.. എന്ന് മാത്രമല്ല , അകലെ നിന്നു വരുന്നവര്‍ ഉച്ചത്തില്‍ ഹോണ്‍ മുഴക്കുകയും ചെയ്യുന്നു.. ഇവര്‍ ഒരു സ്റ്റെപ് മുന്നോട്ട് വയ്ക്കുമ്പോള്‍ തന്നെ ഹോണ്‍ കേള്‍ക്കും , അപ്പോള്‍ വീണ്ടും പുറകോട്ട് മാറേണ്ടി വരും..

കുറച്ചു നേരം അകലെ നിന്നും ഇത് നോക്കി നിന്നപ്പോള്‍ എന്റെ ക്ഷമ കേട്ടു.. അവരെ സഹായിക്കാന്‍ തോന്നി ഞാന്‍ വണ്ടി തിരിച്ചു.... പക്ഷെ അടുത്തേക്ക് ചെല്ലേണ്ടി വന്നില്ല..
വാഹനങ്ങളുടെ തിരക്ക് അല്‍പ്പം കുറഞ്ഞു.. അത് കൊണ്ട് (അത് കൊണ്ട് മാത്രം ) അവര്‍ വളരെ പെട്ടന്ന് തന്നെ റോഡ്‌ മുറിച്ചു കടന്നു..

തിരികെ പോരുമ്പോള്‍ ആലോചിച്ചു.. വേണ്ടതും വേണ്ടാത്തതും ഒക്കെ കാണുകയും എന്തിനും ഏതിനും അഭിപ്രായങ്ങളും ആക്ഷേപങ്ങളും ഒക്കെ പറയുകയും ചെയ്യുന്ന നമ്മള്‍ ഇതിനിടയില്‍ അത്യാവശ്യം വേണ്ട മാനുഷിക മൂല്യങ്ങള്‍ മറന്നു പോയിത്തുടങ്ങിയെന്നു തോന്നുന്നു..

എവിടെയൊക്കെയോ എത്തിപ്പെടാനുള്ള തിരക്ക് കൊണ്ട് ഭ്രാന്ത് പിടിച്ച പോലെ ഓടുന്നു !

ഇവിടെ ആരാണ് യഥാര്‍ത്ഥ അന്ധന്മാര്‍ ?

ഒരു മലബാര്‍ ഓര്‍മ്മക്കുറിപ്പ്

2010-02-16T08:39:00.000-08:00

തലശ്ശേരി.. ഏഴു വര്‍ഷം മുന്‍പാണ് ഞാന്‍ ഈ നഗരത്തില്‍ ആദ്യമായി വരുന്നത്. ആദ്യ ദര്‍ശനത്തില്‍ തന്നെ ഈ നഗരത്തോട് എന്തെന്നില്ലാത്ത ഒരടുപ്പം തോന്നിയിരുന്നു .
വീണ്ടും വന്നത് ഈ പ്രണയദിനത്തില്‍ . ഈ വരവില്‍ പഴയ അടുപ്പം മാറി പ്രണയമായി മാറിയത് അതുകൊണ്ടായിരിക്കും. .

ചരിത്രം ഉറങ്ങുന്ന കടലോര നഗരമാണ് തലശ്ശേരി. കാല്‍പന്തു കളിയുടെയും കേക്കിന്റെയും നഗരം.. ഇന്ത്യയില്‍ സര്‍ക്കസും ക്രിക്കറ്റും ജനിച്ചത് ഇവിടെയാണ്‌ . ഒരുപാട് പ്രശസ്ത വ്യക്തികളുടെ ജീവിതത്തിനു സാക്ഷ്യം വഹിച്ച ഒരു പഴയ നഗരം.

ഇന്നത്തെ തലശ്ശേരി തിരക്ക് പിടിച്ച ഒരു വലിയ നഗരമാണ് . കേരളത്തിന്റെ ഫാഷന്‍ ക്യാപിറ്റല്‍ എന്ന് വേണമെങ്കില്‍ ഈ നഗരത്തെ വിശേഷിപ്പിക്കാം. ഏവിയേറ്റര്‍ ഗ്ലാസും ഡിസൈനര്‍ താടിയും വച്ച് ബൈക്ക് പറത്തുന്ന ചുള്ളന്‍ പയ്യന്മാരും മൊഞ്ചുള്ള പെണ്‍കുട്ടികളും അലങ്കാരങ്ങള്‍ കുത്തി നിറച്ച് ചീറിപ്പായുന്ന ബസ്സുകളും ഏറ്റവും പുതിയ ഫാഷനില്‍ [കൊച്ചിയെക്കാള്‍ മികച്ചത് !] വസ്ത്രങ്ങള്‍ വില്‍ക്കാന്‍ വച്ചിരിക്കുന്ന ബഹുനില മന്ദിരങ്ങളും നിറഞ്ഞ നഗരം. എന്നാല്‍ ഇതിനിടയിലും നൂറ്റാണ്ടുകളുടെ പഴക്കമുള്ള കെട്ടിടങ്ങളും ഉന്തുവണ്ടികളും ഇടുങ്ങിയ തെരുവുകളും ചെറിയ കടകളും ഈ പുതുമയോട് ഇഴ ചേര്‍ന്ന് നില്‍ക്കുന്ന കാഴ്ച തന്നെയാണ് ഈ നഗരത്തിന്റെ മുഖ്യ ആകര്‍ഷണം..

തലശ്ശേരിയിലൂടെ യാത്ര തുടര്‍ന്നു.. ലക്‌ഷ്യം അതിനപ്പുറമുള്ള ഒരു ചെറിയ സ്ഥലമാണ് .

മാഹി ! ബടകരയ്ക്കും [ഇവിടത്തുകാര്‍ ഒഴികെയുള്ളവര്‍ വടകര എന്നും പറയും !! ] തലശ്ശേരിക്കും ഇടയിലുള്ള ഒരു കൊച്ചു നാട്. മൂന്ന് വശങ്ങളിലും കേരളമാണ് .. എന്നിട്ടും പോണ്ടിച്ചേരി എന്ന കേന്ദ്രഭരണ പ്രദേശത്തിന്റെ കീഴിലാണ് മാഹി .. 1954 വരെ ഫ്രെഞ്ച്കാരുടെ കോളനി ആയിരുന്നു മാഹി. അത് കൊണ്ട് തന്നെ അവര്‍ പോയപ്പോള്‍ മറ്റൊരു ഫ്രഞ്ച് കോളനി ആയിരുന്ന പോണ്ടിച്ചേരിയുടെ കൂടെ മാഹിയെ ഉള്‍പ്പെടുത്തി. കേരളത്തില്‍ നിന്നും 20 മീറ്റര്‍ നടന്നാല്‍ ഈ കൊച്ചു തമിഴ്നാട്ടില്‍ എത്താം. പോണ്ടിച്ചേരി ഗവണ്മെന്റ് ബസ്സുകള്‍ , പോലീസ് ജീപ്പുകള്‍ , പാളത്തൊപ്പി വച്ച തമിഴന്മാരായ പോലീസുകാര്‍ .....

എം മുകുന്ദന്റെ മയ്യഴി ആണ് മനസ്സില്‍ ഉള്ളതെങ്കില്‍ ഈ മാഹി കാണുമ്പോള്‍ ആ നോവല്‍ വെറും സാങ്കല്‍പ്പികമാണെന്ന് തോന്നാം. കാലം ഒരുപാട് കഴിഞ്ഞത് കൊണ്ട് തന്നെയാവാം ഈ മാറ്റം. മാറാതെ നില്‍ക്കുന്നത് മാഹി കടപ്പുറവും അഴിമുഖവും കടലിലേക്ക് ഇറങ്ങി നില്‍ക്കുന്ന പാറകളും മാഹിപ്പാലവും മാത്രം.

മദ്യപാനികള്‍ ഒരിക്കലെങ്കിലും വന്നിരിക്കേണ്ട സ്ഥലമാണ് മാഹി. മുഴുക്കുടിയന്മാര്‍ വന്നാല്‍ തിരിച്ചു പോകില്ലെന്ന് ഉറപ്പിക്കാം.. വെറും ഒരു 20 മീറ്റര്‍ നീളമുള്ള മാഹിപ്പാലം നടന്നു പകുതി എത്തുമ്പോള്‍ തന്നെ , അടിച്ചു കോണ്‍ തിരിഞ്ഞു നിലത്തു കിടക്കുന്നവരെ കാണാം !! പാലത്തിന്റെ കൈവരിയില്‍ തുണി ഉണക്കാനിട്ട പോലെ കിടക്കുന്ന ഒരു സീനിയര്‍ സിറ്റിസന്‍ പാമ്പാണ് ഞങ്ങളെ എതിരേറ്റത്.

'മാഹിയിലേക്ക് സ്വാഗതം ' .

മാഹിയിലേക്ക് കാലെടുത്തു വച്ചപ്പോള്‍ കണ്ട ഈ ബോര്‍ഡിന്

ശേഷം കണ്ട ബോര്‍ഡുകള്‍ എല്ലാം തന്നെ വൈന്‍ ഷാപ്പുകളുടെതാണ് [നമ്മുടെ ബെവ്കോ മാതിരി ]. നമ്മുടെ നാട്ടില്‍ ഒരു പട്ടണത്തിനു ഒന്ന് വച്ച് മാത്രം അനുവദിക്കുന്ന ബിവറെജെസ് ശാലകള്‍ ഓര്‍ത്തപ്പോള്‍ ലജ്ജ തോന്നി ! കേരളം വികസനത്തില്‍ പിന്നോട്ടാണ് എന്ന് മാഹി കാണുമ്പോള്‍ [മാത്രം] നമുക്ക് മനസിലാവും.

റോഡിന്‍റെ ഇരു വശങ്ങളിലും നിര നിരയായി വിദേശ മദ്യശാലകള്‍ മാത്രം ! !!

ഉച്ച സമയമായതു കൊണ്ടാവാം.. ഒരു തിരക്കുമില്ല.. അല്ലെങ്കിലും ഇത്രെയധികം കടകള്‍ ഉള്ളപ്പോള്‍ എന്തിനു തിരക്ക്.. കേരളത്തിലെ ബെവ്കോയുടെ മുന്നില്‍ മണിക്കൂറുകളോളം ക്യൂ നിന്നു പടം മടങ്ങുന്ന പാവം മലയാളിയെ ഓര്‍മ വന്നു !

കേരളത്തില്‍ കിട്ടുന്ന ഒരുമാതിരി ലോക്കല്‍ തറ കുപ്പികള്‍ ഒന്നും തന്നെയില്ല.. എല്ലാം മലയാളികളുടെ 'റേഞ്ച് കൂടിയ' സാധനങ്ങള്‍ . വിലയോ ? 40 മുതല്‍ 50 ശതമാനം വരെ കുറവും !
[ചാല'ക്കുടി'ക്കാര്‍ ആരെങ്കിലും ഇത് വായിച്ചു ബോധം കേട്ടാല്‍ ഞാന്‍ ഉത്തരവാദി അല്ല]

മിക്ക വൈന്‍ ഷാപ്പുകളുടെയും മുകളില്‍ തന്നെ ബാറും ഉണ്ട്. തമിഴ്നാട് സെറ്റപ്പ് തന്നെ. വീണ്ടും നടന്നു.. Regent Hotel A/C Bar എന്ന ബോര്‍ഡ് കാണും വരെ.. ഒന്ന് കയറി നോക്കാം എന്ന് കരുതി..

നല്ല ഡീസന്റ് ബാര്‍ . അധികം കുടിയന്മാര്‍ ഇല്ല.. ഏസീയില്‍ ആരുമില്ല.. അങ്ങോട്ട് തന്നെ കയറി. ബെയറര്‍ മെനു തന്നു. വായിച്ചു നോക്കിയപ്പോള്‍ തന്നെ കണ്ണ് തള്ളിപ്പോയി.. എല്ലാത്തിനും എറണാകുളത്തു ഉള്ളതിന്റെ പകുതി വില. ഞങ്ങള്‍ക്ക് ഫയങ്കര സംശയം . പതുക്കെ ബെയററെ അടുത്ത് വിളിച്ചു രഹസ്യമായി ചോദിച്ചു - ചേട്ടാ ഇത് പെഗ് റേറ്റ് തന്നെ ആണോ ? പുള്ളി വളരെ നിഷ്ക്കളങ്കമായി 'അതേലോ' എന്ന് മറുപടി പറഞ്ഞു.. ഉടന്‍ നാട്ടിലുള്ള പയ്യന്മാരെ ഒക്കെ ഫോണ്‍ വിളിച്ചു ഈ സന്തോഷ വാര്‍ത്ത‍ അറിയിച്ചു.. അവന്മാര്‍ക്ക് ഒരേ ഡൌട്ട്.. അത് കൊണ്ട് ഈ മെനു കാര്‍ഡ്‌ ഞങ്ങള്‍ ക്യാമറയില്‍ പകര്‍ത്തി.. തെളിവ് വേണമല്ലോ... !!

അവസാനം വളരെ തുച്ച്ചമായ ബില്‍ ! സ്വയം പുച്ച്ചം തോന്നി ..

അവിടെ നിന്നിറങ്ങി നേരെ മാഹി കടപ്പുറത്ത് ചെന്നു. അഴിമുഖത്തോട് ചേര്‍ന്ന് നടപ്പാത നിര്‍മിക്കുന്നു..
കടല്‍ഭിത്തിക്കടുത്തു വരെ ബീച്ച് കടല്‍ കയ്യേറിയിരുന്നു. അത് കൊണ്ട് അങ്ങോട്ട്‌ പ്രവേശനമില്ല എന്നൊരു ബോര്‍ഡ് കണ്ടു.. പിന്നെ ഒന്നും നോക്കിയില്ല, എല്ലാവരും വളരെ കഷ്ട്ടപ്പെട്ടു പാറകളിലൂടെ നടന്നു ബോര്‍ഡിനപ്പുറം പോയി കടലിലേക്ക് നോക്കി ഇരുന്നു.. ഒരു വശത്ത് ബീച്ച് , ഒരു വശത്ത് കടല്‍ , മൂന്നാമത്തെ ദിശയില്‍ മാഹിപ്പാലം.. മനോഹരമായ കാഴ്ച !!

സൂര്യസ്തമയത്തിനു നന്നേ മുന്പ് അവിടുന്ന് തിരിച്ചു.. വീണ്ടും തലശ്ശേരിയില്‍ ചെന്നു. ഓട്ടോ പിടിച്ചു തലശ്ശേരി കടല്‍പ്പാലത്തില്‍ എത്തി.. പുരാതനമായ കെട്ടിടങ്ങള്‍ , നാട്ടുമാങ്ങയും നെല്ലിക്കയും കടലയും ഒക്കെ വില്‍പ്പനക്ക് വച്ചിരിക്കുന്ന ഉന്തുവണ്ടി , കടലിലേക്ക് എത്തിനില്‍ക്കുന്ന പാലം. തലശ്ശേരിക്ക് സൌന്ദര്യം വര്‍ധിച്ചിരുന്നു ..

തലശ്ശേരി കടല്‍പ്പാലത്തിന്റെ അറ്റത്തിരുന്നു കടല്‍ക്കാറ്റേറ്റ് സൂര്യാസ്തമയം കാണുന്നതിനെക്കുറിച്ച് എഴുതി ഫലിപ്പിക്കാന്‍ മാത്രം സാഹിത്യം എനിക്കറിയില്ല.. അത്ര മനോഹരമായ അനുഭവമായിരുന്നു ..

ചില ഫോട്ടങ്ങള്‍ എടുത്തു...

ഇരുട്ട് വീണു തുടങ്ങിയപ്പോള്‍ അവിടുന്ന് തിരിച്ചിറങ്ങി..

മടക്കയാത്ര ..

ഇനിയും തിരിച്ചു വരാനുള്ള ആഗ്രഹം മനസ്സ് കൊണ്ട് തലശേരിയോടു മന്ത്രിച്ചു യാത്ര പറഞ്ഞു !!

മാധ്യമ (ശവ) സംസ്കാരം !

2010-02-09T07:28:00.000-08:00

പ്രഹസനം എന്ന നിലയില്‍ നിന്നും കടുത്ത അധ:പ്പതനം എന്ന അവസ്ഥയിലേക്ക് ദിനം പ്രതി കൂപ്പു കുത്തുന്ന കേരളത്തിലെ മാധ്യമങ്ങളെ ബെര്‍ളി പിച്ചിച്ചീന്തുന്ന പോസ്റ്റ്‌ വായിക്കാനിടയായി.. കുറച്ചു നാള്‍ മുന്പ് വരെ മലയാളികള്‍ തമാശയായിട്ട് മാത്രമേ ഈ മാധ്യമപ്പടയുടെ പേക്കൂത്തുകള്‍ കണ്ടിരുന്നുള്ളൂ.. എന്നാല്‍ , അതീവ ഗുരുതരാവസ്ഥയില്‍ കഴിഞ്ഞിരുന്ന മലയാളത്തിന്റെ പ്രിയ നടന്‍ കൊച്ചിന്‍ ഹനീഫയെ ഏറ്റവും ആദ്യം 'അന്തരിപ്പിക്കാന്‍ ' മാധ്യമങ്ങള്‍ കാണിച്ച വ്യഗ്രതയെ ഭയത്തോട് കൂടിയാണ് ഇന്ന് കേരള ജനത കാണുന്നത്.. മാധ്യമ അരാജകത്വത്തെ തുറന്നു കാട്ടുന്ന ഈ പോസ്റ്റ്‌ ചിരിപ്പിക്കുന്നതിനോടൊപ്പം നമ്മളെ ചിന്തിക്കാനും പ്രേരിപ്പിക്കുന്നു..

രാഷ്ട്രീയക്കാര്‍ 'മാധ്യമ സിന്റികെയ്റ്റ്' എന്ന ഓമനപ്പേരില്‍ വിളിക്കുന്ന ഈ മഹാവ്യാധിയെ തടുക്കാന്‍ എല്ലാ മലയാളികളും ഉണര്‍ന്നു പ്രവര്‍ത്തിക്കാനുള്ള സമയം അതിക്രമിച്ചിരിക്കുന്നു..

ഈ കഴിഞ്ഞ ശനിയാഴ്ച കേരളത്തില്‍ അപ്രതീക്ഷിത സന്ദര്‍ശനം നടത്തിയ രാഹുല്‍ ഗാന്ധിയുടെ വാര്‍ത്തകള്‍ 'ആദ്യം' ജനങ്ങളില്‍ എത്തിക്കാന്‍ മത്സരിക്കുന്ന ചാനലുകാര്‍ തന്നെ ഉണ്ടാക്കിയ ഒരു വാര്‍ത്തയാണ് ഈ പോസ്റ്റ്‌ എഴുതാനുള്ള 'പ്രചോദനം'.

വിമാനത്താവളത്തില്‍ രാഹുല്‍ വന്നിറങ്ങിയത് കേട്ടറിഞ്ഞു കാറുകളിലും ജീപ്പുകളിലും ഒറ്റക്കയ്യില്‍ തൂങ്ങിക്കിടന്നു മറ്റെക്കയ്യിലെ ക്യാമറയില്‍ രാഹുലിന്റെ നീക്കങ്ങള്‍ പകര്‍ത്താന്‍ വിറളി പിടിച്ചോടുന്ന ചാനല്‍ പടയെ നമ്മള്‍ ആ മാധ്യമത്തിലൂടെ തന്നെ കണ്ടതാണ്.

എന്നാല്‍ , സ്വന്തമായി ഒരു ചാനല്‍ ഇല്ലാത്തത് കൊണ്ടാവാം , മാതൃഭൂമി പത്രത്തിലാണ് ഈ വാര്‍ത്ത‍ പ്രസിദ്ധീകരിച്ചത് കണ്ടത് .

"സ്വന്തം വീട്ടുമുറ്റത്തെ സൂര്യകാന്തിപ്പൂക്കള്‍ കൊണ്ട് പൂക്കുട ഉണ്ടാക്കിയാണ് എഴാം ക്ലാസ്സുകാരന്‍ ഷാഫി മുഹമ്മദും അനുജത്തി ഷഫ്നയും രാഹുലിനെ കാണാന്‍ എത്തിയത്. ബുള്ളറ്റ് പ്രൂഫ്‌ വാഹനത്തില്‍ നീങ്ങിയ രാഹുല്‍ , തന്നെ നോക്കി കൈ വീശിക്കാണിക്കുന്ന കുട്ടികളുടെ അടുത്ത് വണ്ടി നിര്‍ത്തി ചാടിയിറങ്ങി. പൂക്കുട സ്വീകരിച്ചു തന്റെ മുഖത്ത് തലോടിയ രാഹുലിനോട് സ്കൂളിലെ നോട്ടുപുസ്തകം കാണിച്ചു ഷാഫി ഓട്ടോഗ്രാഫ് ചോദിച്ചു. സുരക്ഷ ഉദ്യോഗസ്ഥന്റെ കയ്യില്‍ നിന്നും പേന വാങ്ങി ഉടന്‍ തന്നെ രാഹുല്‍ ആ പുസ്തകത്തില്‍ ഓട്ടോഗ്രാഫ് എഴുതിക്കൊടുത്തു. ഇതിനു ശേഷം അദ്ദേഹം തന്റെ വാഹനത്തില്‍ കയറിപ്പോകുകയും ചെയ്തു "

പോരെ പൂരം. രാഹുലിന്റെ ഓട്ടോഗ്രാഫ് ആണ് പയ്യന്റെ ബുക്കില്‍ . അദ്ദേഹത്തിന്റെ കയ്യൊപ്പ് ആദ്യം ക്യാമറയില്‍ പകര്‍ത്തി മലയാളികള്‍ക്ക് മുന്നില്‍ എത്തിക്കുക എന്ന ഉദ്ദേശത്തില്‍ രാഹുലിന്റെ വാഹനവ്യൂഹത്തെ പോലും മറന്നു ചാനല്‍പ്പട പയ്യന്റെ ചുറ്റും കൂടി.

"രാഹുലിന്റെ കയ്യൊപ്പ് സ്കൂളില്‍ എല്ലാവരെയും കാണിക്കണം എന്ന് പയ്യന്‍സ് പറഞ്ഞു തീരും മുന്‍പേ അതിന്റെ പടം പിടിക്കാന്‍ വേണ്ടി ചാനലുകാര്‍ മത്സരിച്ചു. കയ്യൊപ്പ് പതിഞ്ഞ നോട്ടുബുക്ക് ക്യാമറയില്‍ പകര്‍ത്താനുള്ള ചാനല്‍ പ്രവര്‍ത്തകരുടെ തിക്കിലും തിരക്കിലും പെട്ട് നോട്ടുബുക്ക് പലതായി കീറിപ്പോയി !!"

പയ്യന്‍സ് ഇത് കണ്ടു ഡെസ്പായി കരച്ചിലും തുടങ്ങി.. ആകെ ബഹളമയം !

മാധ്യമ പ്രവര്‍ത്തകരുടെ ഈ പ്രകടനം വായിച്ചപ്പോള്‍ എല്ലും കഷ്ണത്തിന് വേണ്ടി തെരുവുനായ്ക്കള്‍ കടിപിടി കൂടുന്ന സീന്‍ ആണ് ഓര്‍മ വന്നത്. രാഹുല്‍ ഗാന്ധി ചിലപ്പോള്‍ ഈ രാജ്യത്തിന്‍റെ ഭാവി പ്രധാനമന്ത്രി ആയിരിക്കാം. അന്ന് അദ്ദേഹത്തിന്റെ കയ്യൊപ്പിനു വലിയ വിലയും ഉണ്ടാകുമായിരിക്കും.. പക്ഷെ ഒരു കുട്ടിയുടെ നോട്ട്ബുക്കില്‍ ഓട്ടോഗ്രാഫ് കൊടുത്തത് ക്യാമറയില്‍ പകര്‍ത്തി മലയാളികളെ കാണിച്ചിട്ട് ആര്‍ക്ക് എന്ത് നേട്ടം ?

അല്ലെങ്കിലും ജനങ്ങളുടെ നേട്ടത്തിന് എന്ത് വില !

പയ്യന്‍സിന്റെ പുസ്തകം വലിച്ചു കീറിയത് മിച്ചം .

സ്വര്‍ഗ്ഗത്തിലെ ചട്ടമ്പികള്‍ [സിനിമ]

2010-02-04T08:36:00.000-08:00

ചട്ടമ്പിനാട്
ദിശാബോധമുള്ള കഥ കൊണ്ടും, ശക്തമായ തിരക്കഥ കൊണ്ടും, അവതരണത്തിലെ വൈവിധ്യവും കൊണ്ട് മലയാള സിനിമാ ചരിത്രത്തിലെ ഏറ്റവും വലിയ ഹിറ്റായ 'രാജമാണിക്യം' എന്ന സിനിമയുടെ ഓര്‍മ്മകള്‍ തിരക്കഥാകൃത്തായ ബെന്നി പി നായരമ്പലം വീണ്ടും പൊടി തട്ടിയെടുത്ത് നിറം മാറ്റി നമുക്ക് മുന്നില്‍ എത്തിച്ചു തന്നിരിക്കുന്നു.. ചുരുക്കിപ്പറഞ്ഞാല്‍ പുതിയതും ചവര്‍പ്പുള്ളതുമായ വീഞ്ഞ് ആ പഴയ കുപ്പിയില്‍ നിറച്ചു മലയാളിയുടെ മുന്നിലേക്ക് എത്തിച്ചതാണ് ചട്ടമ്പിനാട് എന്ന ചിത്രം. രാജമാണിക്യത്തിന്റെ ഹാങ്ങ്‌ ഓവര്‍ മലയാളിക്ക് മാറിത്തുടങ്ങി എന്ന് ഷാഫിക്കും തോന്നിക്കാണണം. അല്ലെങ്കില്‍ പിന്നെ ലോലിപോപ്പ് എന്ന ചിത്രം തന്റെ കരിയറില്‍ വരുത്തിയ കരിനിഴല്‍ പെട്ടന്ന് മായ്ച്ചു കളയാനുള്ള എളുപ്പവഴി ഇതാണെന്ന് കരുതിക്കാണും.. എന്തായാലും ഒറ്റവാക്കില്‍ ചട്ടമ്പിനാട് തികഞ്ഞ ഒരു പരാജയമാണ് എന്ന് തന്നെയാണ് എനിക്ക് തോന്നുന്നത്.. മള്‍ട്ടി കളര്‍ വേഷത്തില്‍ നിന്നും തൂവെള്ള വേഷത്തിലേക്കുള്ള മമ്മൂട്ടിയുടെ മാറ്റം തന്നെയാണ് ചിത്രത്തില്‍ എടുത്ത് പറയാനുള്ള 'പുതുമ' . ഒപ്പം തിരോന്തോരം സ്ലാംഗ് മാറ്റി കന്നഡ ഭാഷ തിരുകി കയറ്റി. [മമ്മൂട്ടിയുടെ കൂടെ കര്‍ണാടകത്തില്‍ താമസിക്കുന്ന വിനു മോഹന്‍ ഉള്‍പ്പടെ ആര്‍ക്കും ആ ഭാഷ കിട്ടിയിട്ടില്ല എന്നതാണ് ആശ്ചര്യവും ഒപ്പം ആശ്വാസവും നല്‍കുന്ന കാര്യം ].

ഗ്രാമത്തില്‍ നിന്നും കുട്ടിക്കാലത്ത് ഒളിച്ചോടി അന്യദേശത്തു പോയി സകല തരികിടയും പഠിച്ചു സമ്പന്നനായ മാണിക്യം ഇതില്‍ മല്ലയ്യ ആയിട്ടുണ്ട്. ഒളിച്ചോട്ടവും മറ്റും പഴയത് തന്നെ. തെറ്റിധാരണ കൊണ്ട് തന്നെ ഇത്തവണയും നാട് വിടേണ്ടി വന്നത്. നഷ്ട്ടപ്പെട്ടത് തിരിച്ചു മേടിക്കാനും തെറ്റിധാരണകള്‍ തിരുത്താനും തന്നെ മടങ്ങിവരവും. രഹ്മാന് പകരം വിനു മോഹന്‍ കൂടെയുണ്ട്. നാട്ടില്‍ എത്തുമ്പോള്‍ പദ്മപ്രിയയുടെ റോളില്‍ ഇത്തവണ ലക്ഷ്മി റായ് ഉണ്ട്. മനോജ്‌ കെ ജയന് ഒരു വ്യത്യാസവും ഇല്ല എന്ന് തന്നെ പറയാം.

മമ്മൂട്ടിയുടെ കുറ്റിത്താടിയും കടുക്കനും മോതിരങ്ങളും ഒക്കെ അദ്ദേഹത്തിന്റെ പ്രായം വീണ്ടും കുറച്ചിരിക്കുന്നു എന്ന വസ്തുത പറയാതെ വയ്യ. സുരാജ് വെഞ്ഞാറമൂട് അവതരിപ്പിച്ച ദശമൂലം എന്ന കഥാപാത്രമാണ് ഒത്തിരി കയ്യടി നേടിയത്. തന്റെ സ്ഥിരം സ്റ്റൈല്‍ ആവര്‍ത്തിച്ച സുരാജ് , മലയാളികള്‍ക്ക് തന്നെ മടുത്തു തുടങ്ങിയിട്ടില്ല എന്ന് വീണ്ടും തെളിയിച്ചു. കഥയിലെ വില്ലനെ അവതരിപ്പിച്ച സിദ്ദിക്ക് പ്രത്യേകിച്ച് പുതുമകള്‍ ഒന്നും അവകാശപ്പെടാനില്ലാത്ത ഒരു കഥാപാത്രമായി ഒതുങ്ങി. ജനാര്‍ദനന്‍ , സലിംകുമാര്‍ തുടങ്ങിയവരും അവിടിവിടെ പ്രത്യക്ഷപ്പെടുന്നുണ്ട്. ഒന്നോ രണ്ടോ ഡയലോഗുകളില്‍ ഒതുങ്ങിക്കൂടാനായിരുന്നു മൈഥിലിയുടെ കഥാപാത്രത്തിന്റെ വിധി.

ശ്രദ്ധിക്കാന്‍ മാത്രം ഉള്ള ഗാനങ്ങള്‍ അലക്സ്‌ പോളിനും സൃഷ്ടിക്കാന്‍ പറ്റിയില്ല. ക്യാമറമാന്‍ മനോജ്‌ പിള്ളയുടെ കഴിവുകള്‍ വിനിയോഗിക്കാന്‍ ഒരു അവസരം ഈ തിരക്കഥയില്‍ ഉണ്ടായിടുണ്ടോ എന്നും സംശയമാണ്. എങ്ങനെയെങ്കിലും തീര്‍ക്കാന്‍ പാട് പെടുന്ന ഒരു കാഴ്ചയാണ് ഇടവേളയ്ക്കു ശേഷം. ഒന്നിനും കൊള്ളാത്തതും അവിശ്വസനീയവും ആയ ഒരു ക്ലൈമാക്സ്‌ കൂടി ആയപ്പോള്‍ ഈ സിനിമയുടെ പരാജയം പൂര്‍ണമായി.

കൂടുതല്‍ എഴുതാന്‍ വയ്യ !

ഇവിടം സ്വര്‍ഗ്ഗമാണ്

വ്യത്യസ്തതയുമായി റോഷന്‍ ആണ്ട്രൂസ് വീണ്ടും ! ഇത്തവണ മോഹന്‍ലാല്‍ എന്ന അഭിനേതാവിന്റെ സുവര്‍ണ കാലഘട്ടത്തിലെ ചില കഥാപാത്രങ്ങളെ അനുസ്മരിപ്പിക്കുന്ന ഒരു നായകനെയാണ് റോഷന്‍ നമുക്ക് മുന്നില്‍ അവതരിപ്പിച്ചത്. മിടുക്കനും ബുദ്ധിമാനുമായ വിദ്യാര്‍ഥി ആയിരുന്നിട്ടും പിതാവിന്റെ കടങ്ങള്‍ വീട്ടാന്‍ വേണ്ടി കര്‍ഷകനായി , ഒടുവില്‍ മണ്ണില്‍ പൊന്നു വിളയിക്കുന്ന ഒരു വലിയ പ്രകൃതി സ്നേഹിയായി മോഹന്‍ലാല്‍ വീണ്ടും സാധാരണക്കാരന്റെ വേഷത്തില്‍ എത്തുന്നു. ഒരുപാട് പക്ഷി മൃഗാദികള്‍ ഉള്ള ഒരു വലിയ ഫാം നടത്തുന്ന നായകന്‍റെ സ്ഥലം ഭൂമാഫിയക്കാരനായ വില്ലന്‍ കണ്ണ് വയ്ക്കുന്നിടത്ത് ചിത്രം ആരംഭിക്കുന്നു.

ജെയിംസ്‌ ആല്‍ബെര്‍ട്ട് എന്ന തിരക്കഥാകൃത്തിന്റെ ശക്തമായ തൂലിക തന്നെയാണ് ഈ ചിത്രത്തിന്റെ വിജയം. കഥയുടെ നൂലാമാലകള്‍ വളരെ സൂക്ഷ്മമായി പഠിച്ചു തന്നെയാണ് അദ്ദേഹം ഈ ചിത്രം രചിച്ചിരിക്കുന്നത്. സമകാല സംഭവങ്ങളെ വളരെയധികം അപഗ്രഥിച്ചു കൊണ്ടാണ് ഈ കഥ മുന്നോട്ട് പോകുന്നത്.

ഒരു പക്ഷെ നായകനായ മോഹന്‍ലാലിനേക്കാള്‍ അഭിനയ സാധ്യത കൂടിയ ഒരു വില്ലന്‍ കഥാപാത്രത്തെ തന്മയത്വത്തോട്‌ കൂടി അവതരിപ്പിച്ച ലാലു അലക്സ് ഈ ചിത്രത്തിന്റെ വിജയത്തിന്റെ നല്ലൊരു ശതമാനം തന്റെ പേരില്‍ കുറിച്ചിട്ടുണ്ട്. ആലുവ ചാണ്ടി എന്ന ഈ കഥാപാത്രം ലാലു അലക്സിന്റെ അഭിനയ ജീവിതത്തിലെ ഒരു പൊന്‍ തൂവലാണ് എന്നതില്‍ സംശയമില്ല .

വിരോധാഭാസമെന്നു തോന്നാം , ഇതേ കഥാപാത്രം തന്നെയാണ് ചിത്രത്തിന്റെ ഒരു മുഖ്യ ന്യൂനതയും. വളരെ നെഗറ്റീവ് ആയ ഒരു കഥാപാത്രമായി തുടങ്ങിയിട്ടും അവസാനമാവുമ്പോള്‍ അവിശ്വസനീയമായ രീതിയില്‍ പാവമാകുന്ന ഒരു വില്ലന്‍ കഥാപാത്രമായി പ്രേക്ഷകര്‍ക്ക് അനുഭവപ്പെട്ടു. എതിര്‍ക്കുന്നവരെ കൊന്നു കുഴിച്ചു മൂടിയ ചരിത്രമുള്ള ആലുവ ചാണ്ടിയെ വളരെ പെട്ടന്ന് വെറും ഒരു മണ്ടനും , പ്രേക്ഷകന് സഹതാപം തോന്നുന്ന തരത്തില്‍ ഒരു പാവവും ആക്കി മാറിയത് അല്‍പ്പം കടന്ന കയ്യായിപ്പോയി എന്നൊരു സംശയം തോന്നുന്നു.

നായികമാര്‍ക്ക് ഒരു പഞ്ഞവുമില്ല ! വക്കീല്‍ ആയി ലക്ഷ്മി റായ്യും ചാനല്‍ അവതാരിക ആയി പ്രിയങ്കയും കര്‍ക്കശക്കാരിയായ ഉദ്യോഗസ്ഥ ആയി ലക്ഷ്മി ഗോപാലസ്വാമിയും അവരുടെ ചെറിയ റോളുകള്‍ കുഴപ്പമില്ലാതെ കൈകാര്യം ചെയ്തിട്ടുണ്ട്. നായകനെ സഹായിക്കുന്ന മറ്റൊരു വക്കീലായി ശ്രീനിവാസനും രംഗത്ത് വരുന്നുണ്ടെങ്കിലും അദ്ദേഹത്തിന്റെ കണ്ടു മറന്ന പല കഥാപാത്രങ്ങളുടെയും രൂപം അതില്‍ നിഴലിച്ചിരുന്നു. കൃത്രിമ ആധാരങ്ങള്‍ ഉണ്ടാക്കുന്നതില്‍ പ്രഗല്‍ഭനായ ഒരു ആധാരം എഴുത്തുകാരനായി ജഗതി അതിമനോഹരമായ പ്രകടനമാണ് കാഴ്ച വച്ചിരിക്കുന്നത്. നായകന്റെ കൂട്ടുകാരനായി പഴയകാല നായകന്‍ ശങ്കറും മുഖ്യമായ ഒരു കഥാപാത്രത്തെ അവതരിപ്പിച്ചിരിക്കുന്നു.

ഇന്നത്തെ സമൂഹത്തില്‍ നടക്കുന്ന പല അനീതികളും കൃത്രിമങ്ങളും തുറന്നു കാട്ടുന്നു എന്നത് ചിത്രത്തിന്റെ വിജയം തന്നെയാണ്. എങ്കിലും , വിശ്വസിക്കാന്‍ പ്രയാസമുള്ളത് കൊണ്ടോ അതോ മനപ്പൂര്‍വം അവിശ്വസിക്കാന്‍ ശ്രമിക്കുന്നതോ ആണെന്നറിയില്ല , realistic family thriller എന്ന തലക്കെട്ടില്‍ ഒരല്‍പം unrealistic സംഭവവികാസങ്ങള്‍ ബോധപൂര്‍വം കാണിക്കുന്നില്ലേ എന്നൊരു സംശയം പ്രേക്ഷകന് തോന്നാം. എന്നാല്‍ ഗാനങ്ങളുടെ അഭാവം പോലും ചിത്രത്തിന്റെ മാറ്റിന് ഒരു കുറവും വരുത്തിയിട്ടില്ല എന്നത് വലിയ ഒരു വിജയമാണ്. എല്ലാം കൊണ്ടും മലയാളി പ്രേക്ഷകര്‍ക്ക് വളരെ വലിയ പ്രതീക്ഷകള്‍ തന്നെയാണ് ഈ ചിത്രത്തിലൂടെ റോഷന്‍ ആണ്ട്രൂസ് തന്നിരിക്കുന്നത്. വ്യത്യസ്തമായ അനവധി ചിത്രങ്ങള്‍ നമുക്ക് ഇനിയും ഈ യുവ സംവിധായകനില്‍ നിന്നും പ്രതീക്ഷിക്കാം !

മുറിവാല്‍ : കേരളത്തില്‍ ഭീകരാന്തരീക്ഷം സൃഷ്‌ടിച്ച ബാബാ കല്യാണി , ടൈം , റെഡ് ചില്ലീസ് മുതലായ വമ്പന്‍ ഹിറ്റുകള്‍ കാണേണ്ടി വന്നതിനു ശേഷം ഷാജി കൈലാസിന്റെ പടങ്ങള്‍ കാണില്ല എന്ന് ശപഥം ചെയ്തതായിരുന്നു. എന്നാല്‍ ശരത്കുമാര്‍ അഭിനയിച്ച 'ജഗ്ഗുഭായ്' എന്ന സിനിമ കണ്ടതിനു ശേഷം ആ തീരുമാനം മാറ്റാന്‍ തീരുമാനിച്ചു . ഷാജി എത്ര ഭേദം ! പത്തിരുപത് കോടി രൂപ ചിലവഴിച്ചു എന്ന് രാധിക ശരത്കുമാര്‍ പറഞ്ഞത് എന്തിനു വേണ്ടിയാണ് എന്നും മനസിലായി. ക്ലൈമാക്സ്‌ സീനിലെ ആക്ഷന്‍ കണ്ടപ്പോള്‍ പണ്ട് ദൂരദര്‍ശനില്‍ സംപ്രേക്ഷണം ചെയ്ത 'അലിഫ് ലൈല' എന്ന സീരിയല്‍ ആണ് ഓര്‍മ വന്നത്. പടം കണ്ടിരുന്ന തമിഴന്മാര്‍ വരെ കൂവിപ്പോയി !!

ഗന്ധര്‍വനു ഭൂമിയിലും വിലക്ക് !

2010-01-20T09:27:00.000-08:00

ഗന്ധര്‍വ ഗായകന്‍ എഴുപതാം പിറന്നാള്‍ ആഘോഷിക്കുന്ന ഈ അവസരത്തില്‍ നിറഞ്ഞ പ്രാര്‍ത്ഥനയോടെ അദ്ദേഹത്തിനു ആശംസകള്‍ അര്‍പ്പിക്കുന്നു.. അദ്ദേഹം അനശ്വരമാക്കിയ ഈ കാലഘട്ടത്തില്‍ എനിക്ക് ജീവിക്കാന്‍ സാധിച്ചതിനു സംഗീതത്തെ സ്നേഹിക്കുന്ന ഒരു ആസ്വാദകന്‍ എന്ന നിലയ്ക്ക് ഈശ്വരനോടും കടപ്പെട്ടിരിക്കുന്നു..

യേശുദാസ്‌ ! ഏതു ദിവസത്തിലും, ഏതൊരു സമയത്തും അദ്ദേഹത്തിന്റെ സ്വരം ലോകത്തിന്റെ ഏതെങ്കിലും ഒരു കോണില്‍ സംഗീതമായി അലയടിക്കുന്നുണ്ടാവും.. സംഗീതത്തെ ഇഷ്ട്ടപ്പെടുന്ന ഏതൊരു മലയാളിയും ഒരു ദിവസം ആ മധുര സ്വരം കേട്ടിരിക്കും..

വിവിധ ഭാഷകളിലായി അര ലക്ഷത്തോളം ഗാനങ്ങള്‍ ! സിനിമ , നാടക , ഭക്തി ഗാനങ്ങളിലൂടെ കഴിഞ്ഞ 50 വര്‍ഷമായി മലയാളികളെ അദ്ദേഹം അനുഗ്രഹീതരാക്കി. കേന്ദ്ര - സംസ്ഥാന സര്‍ക്കാരുകളുടെ ബഹുമതികള്‍ [എണ്ണത്തില്‍ ഏറ്റവും കൂടുതല്‍ ] , മറ്റു പുരസ്ക്കാരങ്ങള്‍ , സര്‍വോപരി , ജനകോടികളുടെ സ്നേഹവും ആദരവും... ദേവേന്ദ്ര സഭയില്‍ നിന്നും പുറത്താക്കപ്പെട്ടവര്‍ ആണ് ഗന്ധര്‍വന്മാര്‍ എന്ന് പുരാണങ്ങള്‍ പറയുന്നുണ്ട്.. യേശുദാസ് എന്ന ഗന്ധര്‍വന്‍ അങ്ങിനെയാണ് ഇവിടെ അവതരിച്ചതെങ്കില്‍ അത് മലയാളിയുടെ പുണ്യം .

എഴുപതാം പിറന്നാള്‍ ശ്രുതിമധുരമാക്കാന്‍ അദ്ദേഹം കൊല്ലൂര്‍ മൂക്കാംബിക ക്ഷേത്രത്തില്‍ പോയിരുന്നു എന്ന വാര്‍ത്ത‍ വായിച്ചപ്പോള്‍ ഒരുപാട് സന്തോഷം തോന്നി.. എന്നാല്‍ അതിനോടൊപ്പം തന്നെ മനസ്സില്‍ എന്നും ഒരു ചോദ്യചിന്ഹമായി കിടന്നിരുന്ന ഒരു കാര്യം ഓര്‍മ വന്നു.. ലോകം മുഴുവനും അദ്ദേഹത്തെ ആദരിക്കുമ്പോഴും നമ്മള്‍ മലയാളികള്‍ അല്ലേ ഗാനഗന്ധര്‍വനെ ഏറ്റവും വേദനിപ്പിക്കുന്നത് ? ജാതിയുടെയും മതത്തിന്റെയും ദേശത്തിന്റെയും ഭാഷയുടെയും അതിര്‍വരമ്പുകള്‍ താണ്ടി അദ്ദേഹം യാത്ര തുടരുമ്പോഴും മലയാളികള്‍ അദ്ദേഹത്തിന് അയിത്തം കല്‍പ്പിച്ചിരിക്കുന്നു.

ഭഗവാന്‍ ശ്രീകൃഷ്ണനെ സ്തുതിച്ചു കൊണ്ട് പൂന്താനവും ചെമ്പൈ ഭാഗവതരും പുരന്ദരദാസരും സ്വാതിതിരുന്നാളും പാടിയതിന്റെ സഹസ്രം മടങ്ങ്‌ ഗാനങ്ങള്‍ പാടിയ യേശുദാസ് എന്ന ഭക്തന്റെ മുന്നില്‍ ഗുരുവായൂര്‍ അമ്പലത്തിന്റെ നട നമ്മള്‍ കൊട്ടിയടച്ചു ! .. ഗുരുവായൂര്‍ ക്ഷേത്രത്തില്‍ എന്നും എത്ര അഹിന്ദുക്കള്‍ പ്രവേശിക്കുന്നുണ്ടാവും? പ്രശസ്തനായിപ്പോയി എന്ന ഒറ്റക്കാരണം കൊണ്ട് മാത്രം അദ്ദേഹത്തിന് അത് സാധിക്കുന്നില്ല.. മൂകാംബിക ക്ഷേത്രത്തില്‍ അദ്ദേഹത്തിന് ലഭിച്ച ആദരവും വരവേല്‍പ്പും കാണുമ്പോള്‍ ഒരു മലയാളി എന്ന നിലയില്‍ നമ്മള്‍ ലജ്ജിക്കേണ്ടിയിരിക്കുന്നു..

ഈശ്വരനെ തങ്ങളുടെ പാരമ്പര്യ സ്വത്തായി കണക്കാക്കുന്ന ഒരു സമൂഹം ഇന്നും നമ്മുടെ നാട്ടില്‍ ഉണ്ടെന്നതിന്റെ തെളിവാണ് ഇത്. വികലമായ ചിന്താഗതികള്‍ ഉള്ള ഒരു പറ്റം വിഡ്ഢികളുടെ ഈ നാടിനെ ഭ്രാന്താലയം എന്ന് വിശേഷിപ്പിച്ച മനുഷ്യനെ വന്ദിക്കാതെ വയ്യ . ശ്രീ. വയലാര്‍ രവിയുടെ കൊച്ചു മകന്റെ ചോറൂണ് നടത്തിയെന്ന കാരണം കൊണ്ട് ഗുരുവായൂര്‍ അമ്പലത്തില്‍ ശുദ്ധികലശം നടത്തിയ കാര്യം ഈ അവസരത്തില്‍ ഓര്‍ത്തു പോകുന്നു. ജാതിയെന്നോ മതമെന്നോ ഉള്ള വാക്കുകള്‍ പോലും മനസിലാകാത്ത ഒരു കുഞ്ഞിനോട് ഇങ്ങനെ ചെയ്യുന്നവര്‍ ഭ്രാന്തന്മാരല്ലാതെ പിന്നെന്താണ് ?

'അഹിന്ദുക്കള്‍ക്ക് പ്രവേശനമില്ല ' എന്ന അറിയിപ്പ് കേരളത്തിലെ പ്രധാന ക്ഷേത്രങ്ങളില്‍ എല്ലാം ഉണ്ടെങ്കിലും വളരെ രസകരമായ വേറെ ഒരു വസ്തുത ഉണ്ട്. വിദേശീയരായ ആര്‍ക്കും ഇത് ബാധകമല്ല !! പ്രശസ്തമായ എറണാകുളം ശിവ ക്ഷേത്രത്തില്‍ ശ്രീകോവിലിന്റെ അടുത്ത് വരെ പോയി തൊഴുതു നില്‍ക്കുന്ന (തൊഴാന്‍ അറിഞ്ഞിട്ടല്ല . മറ്റുള്ളവര്‍ ചെയ്യുന്നത് പോലെ നോക്കി ചെയ്യുകയാണ് ) വിദേശീയരെ ഞാന്‍ കാണാറുണ്ട്. അവര്‍ക്കൊന്നും ഇല്ലാത്ത അയിത്തം നമ്മുടെ നാട്ടിലെ അഹിന്ദുക്കള്‍ക്ക് മാത്രമുള്ള നിയമമാവുന്നത് എങ്ങനെയെന്നത് എത്ര ആലോചിച്ചിട്ടും മനസിലാകുന്നില്ല..

സ്വാതന്ത്ര്യത്തിന്റെ ഷഷ്ടിപൂര്‍ത്തി ആഘോഷിച്ചു കഴിഞ്ഞിട്ടും വെള്ളത്തൊലിയോടുള്ള നമ്മുടെ വിധേയത്വം മാറിയിട്ടില്ലാത്തത് കൊണ്ടാണോ ? ആര്‍ക്കറിയാം ?

ഭക്തി മാത്രമാണ് ഈശ്വരനോട് അടുക്കാനുള്ള ഒരേയൊരു മാര്‍ഗം എന്ന് എല്ലാ മതത്തിലും ഒരു പോലെ പറഞ്ഞിട്ടുണ്ടെങ്കിലും ആരുടെയൊക്കെയോ താല്‍പ്പര്യങ്ങള്‍ സംരക്ഷിക്കുവാന്‍ വേണ്ടി നമ്മള്‍ അതെല്ലാം സൌകര്യപൂര്‍വ്വം മറക്കുന്നു.. കാലത്തിന്റെ കുത്തൊഴുക്കില്‍ എപ്പോഴോ എവിടെയോ ആരോ അടിച്ചേല്‍പ്പിച്ച അനാചാരങ്ങള്‍ നമ്മള്‍ ഇന്നും തുടരുന്നു. മതേതര രാഷ്ട്രം എന്ന് കൊട്ടിഘോഷിക്കുമ്പോഴും യഥാര്‍ത്ഥ ആശയത്തില്‍ നിന്നും നമ്മള്‍ എത്രെയോ അകലെയാണ് എന്ന നഗ്നസത്യം മനസ്സിലാക്കാനുള്ള സമയം അതിക്രമിച്ചിരിക്കുന്നു..

ആരാധനാലയങ്ങളില്‍ അല്ല , സ്വന്തം ഹൃദയത്തില്‍ ആണ് ഈശ്വരന്‍ കുടികൊള്ളുന്നത് എന്നും, അമ്പലങ്ങളും പള്ളികളും എല്ലാം സാമൂഹിക കൂട്ടായ്മ ഉണ്ടാവാന്‍ വേണ്ടിയാണ് നിര്‍മിക്കപ്പെട്ടത് എന്നതുമുള്ള തത്വങ്ങള്‍ മനസിലാക്കാന്‍ പറ്റാതെ ജാതിയുടെയും മതത്തിന്റെയും അടിസ്ഥാനത്തില്‍ മനുഷ്യരെ വേര്‍തിരിച്ചു കാണുന്നവരോട് ഈശ്വരന്‍ തന്നെ പൊറുക്കട്ടെ !

മുല്ലപ്പെരിയാറിനെക്കുറിച്ചു ഒരു നിമിഷം

2010-01-13T06:41:00.000-08:00

മുല്ലപ്പെരിയാറിനെക്കുറിച്ചു നിരക്ഷരന്‍ എഴുതിയ ബ്ലോഗ്‌ വായിക്കാനിടയായി. സ്രഷ്ടാവ് പോലും വെറും അര നൂറ്റാണ്ട് മാത്രം ആയുസ്സ് കല്‍പ്പിച്ച ഈ തടയണ കേരളത്തിന്റെയും തമിഴ്നാടിന്റെയും അതിര്‍ത്തിയില്‍ കഴിഞ്ഞ 114 വര്‍ഷമായി നിലകൊള്ളുന്നു. അവസരവാദം മാത്രം കൈമുതലാക്കിയ രാഷ്ട്രീയക്കാര്‍ തന്നെയാണ് ഇപ്പോള്‍ ഈ മഹാവിപത്തിനെ മാടി വിളിക്കുന്നത്..

സംസ്കാരസമ്പന്നരുടെയും ബുദ്ധിജീവികളുടെയും ഈ നാട്ടില്‍ വെറും സാധാരണക്കാര്‍ ആയ നമ്മള്‍ക്കെന്തു ചെയ്യാന്‍ പറ്റും ? എന്നും ചെയ്യാറുള്ളത് പോലെ കയ്യും കെട്ടി നോക്കി നില്‍ക്കുക .. അല്ലെങ്കില്‍ ഭയം തോന്നാണ്ടിരിക്കാന്‍ വ്യതസ്തമായി ചിന്തിക്കുക ... [ദാ.. ഞാന്‍ അങ്ങനെ ചെയ്തപ്പോള്‍ എന്റെ ഭയം മാറി ! ]

" എന്തിനു ഭയക്കണം ? നമ്മള്‍ ഒന്ന് കൊണ്ടും പേടിക്കേണ്ട. പ്രതിരോധവും , ആഭ്യന്തരവും അടക്കം ആറു മന്ത്രിമാര്‍ നമുക്കുണ്ട്. ഒന്നും സംഭവിക്കില്ല എന്ന് ഉറപ്പു തരുന്ന നമ്മുടെ മന്ത്രിമാര്‍ . അവരുടെ ഉറപ്പിനെക്കാള്‍ ബലമുള്ള അണക്കെട്ടുണ്ടോ ? എന്തും നേടിത്തരാന്‍ കെല്‍പ്പുള്ളവര്‍ !
പ്രിന്‍സിപ്പല്‍ സെക്രടറിമാരും ചീഫ് സെക്രടറിമാരും ഏറ്റവും പ്രഗല്‍ഭരായ IAS ഓഫീസിര്‍മാരും നമുക്കുണ്ട്. രാഷ്ട്രീയ കുലപതികളും ആചാര്യന്മാരും നമുക്കുണ്ട് . മുല്ലപ്പെരിയാര്‍ ചര്‍ച്ച ചെയ്യാന്‍ മത്സരിക്കുന്ന ചാനലുകാര്‍ ഉണ്ട്. രണ്ടു മുട്ടനാടുകളെ തമ്മിലടിപ്പിച്ചു ചോര കുടിക്കാന്‍ ഇരിക്കുന്ന കുറുക്കനേപ്പോലെ ചാനലിന്റെ റേറ്റിംഗ് കൂട്ടാന്‍ വേണ്ടി മാത്രം ചര്‍ച്ച നടത്തുന്ന അവതാരകര്‍ ഉണ്ട് . എത്രയെത്ര പൈങ്കിളി കേസുകള്‍ ആണ് അവര്‍ നമ്മളെ ദിവസവും കാണിക്കുന്നത് ? മന്ത്രിമാര്‍ക്കും രാഷ്ട്രീയ നേതാക്കള്‍ക്കും വേണ്ടി ജീവന്‍ വരെ ത്യജിക്കുവാന്‍ തയ്യാറുള്ള എത്രെയോ ഖദര്‍ധാരികളും ചുവപ്പ് വേഷക്കാരും കാവി ഉടുപ്പുകാരും നമുക്കുണ്ട് ? ഇവരെല്ലാം ഉള്ളപ്പോള്‍ നമ്മള്‍ പേടിക്കണോ ? "

നിരക്ഷരന്റെ ഈ ലേഖനത്തിന് അഭിനന്ദനങ്ങള്‍ . താങ്കളുടെ ഈ പരിശ്രമം ശ്ലാഘനീയമാണ് . ആ ദുരന്തം സംഭവിക്കാതിരിക്കട്ടെ എന്ന് നമുക്ക് പ്രാര്‍ഥിക്കാം.. നമ്മളാല്‍ ആവും വിധം ഈ ബോധവല്‍ക്കരണവും പ്രചരിപ്പിക്കാം..

പ്രതീക്ഷയോടെ......

നഷ്ടമാകുന്ന നന്മകള്‍

2010-01-10T07:29:00.000-08:00

മകളെ LKG യില്‍ ചേര്‍ക്കാന്‍ പോയപ്പോള്‍ അവിടുത്തെ അധ്യാപകര്‍ പറഞ്ഞ ഒരു കാര്യം ഒരു സുഹൃത്ത് എന്നോട് പറഞ്ഞു. 'ഞങ്ങളുടെ സ്കൂളില്‍ ഞങ്ങള്‍ കുട്ടികളെ വെറും സിലബസ് പഠിപ്പിക്കുക മാത്രമല്ല ചെയ്യുന്നത് , മറിച്ച് അവരെ ഭാവിയിലെ successful individuals ആക്കി വാര്‍ത്തെടുക്കുകയാണ്' എന്ന്. കേട്ടപ്പോള്‍ ഒരുപാട് സന്തോഷം തോന്നി.. അതിനു വേണ്ടി എന്താണ് അവര്‍ ചെയ്യുന്നതെന്ന് ഞാന്‍ അന്വേഷിച്ചു..

എന്റെ സുഹൃത്ത്‌ തുടര്‍ന്നു... 'കുട്ടികളെ ഞങ്ങള്‍ ഇവിടെ വളരെ ശ്രദ്ധയോടെയാണ് കൈകാര്യം ചെയ്യുന്നത്. ഓരോ കുട്ടിയേയും ഞങ്ങള്‍ പ്രത്യേകം പരിഗണിക്കുന്നുണ്ട്. അവരവരുടെ വസ്തുക്കള്‍ മറ്റാര്‍ക്കും കൊടുക്കുകയോ ലക്‌ഷ്യം ഇല്ലാതെ ഇടുകയോ ചെയ്യാതെ നോക്കാന്‍ കുട്ടികള്‍ക്ക് പരിശീലനം ഇപ്പോഴേ കൊടുക്കും. നിങ്ങളുടെ കുട്ടി ഭാവിയിലെ ഒരു MBA ക്കാരന്‍ അല്ലെങ്കില്‍ ഒരു ഡോക്ടര്‍ അല്ലെങ്കില്‍ ഒരു എഞ്ചിനീയര്‍ ആവാന്‍ നിങ്ങള്‍ക്കുള്ള ആഗ്രഹം ഞങ്ങള്‍ മനസ്സിലാക്കുകയും അതനുസരിച്ച് കുട്ടികളെ വാര്‍ത്തെടുക്കുവാന്‍ ശ്രെദ്ധിക്കുകയും ചെയ്യുന്നു.. ' സുഹൃത്ത്‌ വളരെ സന്തോഷത്തോടെ ഇത് പറഞ്ഞു.. ഞാന്‍ വളരെ വ്യസനത്തോടെ കേട്ടിരുന്നു..

നമ്മള്‍ എങ്ങോട്ടാണ് പോകുന്നത് ? പിറന്നു വീഴുന്ന കുഞ്ഞുങ്ങളെ ഇളം പ്രായത്തിലെ നമ്മള്‍ മാനേജര്‍മാരാക്കുവാന്‍ കഷ്ട്ടപ്പെടുന്നു. കൂടെ പഠിക്കുന്നവന്, അല്ലെങ്കില്‍ കൂടെ കളിക്കുന്ന കൂട്ടുകാര്‍ക്ക് നമ്മളുടേതായ ഒരു വസ്തുവും ഒരിക്കലും കൊടുക്കരുത് എന്ന് ചെറുപ്രായത്തിലെ പറഞ്ഞു മനസിലാക്കുന്നു.. വെയിലത്തോ മഴയത്തോ കൂട്ടുകാരന്‍ കുടയില്ലാതെ നടന്നാലും കൂട്ടത്തില്‍ കൂട്ടരുത് എന്ന് നമ്മള്‍ കുഞ്ഞുങ്ങളോട് പറയുന്നു.. ഒപ്പം നില്‍ക്കുന്നവനെയും ചവിട്ടിക്കയറി ഏറ്റവും മുകളില്‍ എത്തുവാനുള്ള 'managerial skills ' ആയിരിക്കാം ഇതിലൂടെ നമ്മള്‍ പറഞ്ഞു കൊടുക്കുന്നത്.. മാറുന്ന ലോകത്തില്‍ ഏറ്റവും ആവശ്യവും അത് തന്നെ എന്ന് ചിലരെങ്കിലും അഭിപ്രായപ്പെടുന്നുമുണ്ടാവും.. എന്നാല്‍ ഇത് കൊണ്ടെല്ലാം നമ്മള്‍ നഷ്ട്ടപെടുത്തുന്ന ഒരുപാട് മൂല്യങ്ങള്‍ ഉണ്ട് എന്ന വസ്തുത സൌകര്യപൂര്‍വ്വം നമ്മള്‍ മറക്കുന്നു.

നിന്നെപ്പോലെ നിന്റെ അയല്‍ക്കാരനെയും സ്നേഹിക്കുക എന്ന ആപ്തവാക്യം ദൈവപുത്രന്‍ നമുക്ക് പറഞ്ഞു തന്നിട്ട് രണ്ടു സഹസ്രാബ്ദം മാത്രമേ ആയിട്ടുള്ളൂ . ജീവിതത്തില്‍ അത് പകര്‍ത്താനുള്ള സമയം ആയപ്പോഴേക്കും നമ്മള്‍ അത് മറക്കുവാന്‍ ശീലിക്കുന്നു. പുതിയ തലമുറയെ ഈ നന്മകളില്‍ നിന്നും അകറ്റുകയും ചെയ്യുന്നു.. സ്വാര്‍ത്ഥത മാത്രം സ്വായത്തമാക്കിയാണ് നമ്മുടെ പുതിയ തലമുറ വളര്‍ന്നു വരുന്നത്. അപകടത്തില്‍പ്പെട്ട് റോഡില്‍ രക്തം വാര്‍ന്നൊഴുകി കിടക്കുന്ന മനുഷ്യരെ സഹായിക്കാന്‍ നമ്മള്‍ വൈമനസ്യം കാണിക്കുന്നു. നാളെ നമുക്കോ നമ്മളുടെ വേണ്ടപ്പെട്ടവര്‍ക്കോ ഈ അവസ്ഥ വന്നാലോ എന്ന് ചിന്തിക്കാന്‍ പോലും നമ്മള്‍ ശ്രമിക്കുന്നില്ല , പായുന്ന ജീവിതത്തിരക്കിനിടയില്‍ നമുക്കതിനു സമയവുമില്ല . സ്വന്തം കൂട്ടുകാരെ പോലും സഹായിക്കാന്‍ പാടില്ല എന്ന് കുട്ടികളെ പഠിപ്പിക്കുമ്പോള്‍ അച്ഛനമ്മമാര്‍ ഒന്നോര്‍ക്കുക.. നാളെ അവര്‍ നിങ്ങളോടും അങ്ങനെ തന്നയെ പെരുമാറുകയുള്ളൂ !

തൊഴിലധിഷ്ടിതമായ വിദ്യാഭ്യാസം മാത്രം നല്‍കുന്നതിലൂടെ ഒരിക്കലും തിരുത്താനാവാത്ത തെറ്റിലേക്ക് അടുത്ത തലമുറയെ തള്ളിവിടുന്ന ഈ പ്രവണതയെ തുടച്ചു മാറ്റിയെ തീരൂ.. മൂല്യാധിഷ്ടിത വിദ്യഭാസമാണ് നമ്മള്‍ അവര്‍ക്ക് കൊടുക്കേണ്ടത്.. ജാതി മത വര്‍ഗ ഭേദമില്ലാത്ത , മാനുഷിക മൂല്യങ്ങളില്‍ മാത്രം അധിഷ്ടിതമായ ഒരു തലമുറ.. അതായിരിക്കണം നമ്മുടെ ലക്‌ഷ്യം !!

പാലേരി മാണിക്യം[സിനിമ]

2009-12-21T10:21:00.000-08:00

ആധുനിക മലയാള സാഹിത്യത്തിലെ മികച്ച നോവലുകളില്‍ ഒന്നായ ടി പി രാജീവിന്റെ 'പാലേരി മാണിക്യം , ഒരു പാതിരാക്കൊലപാതകത്തിന്റെ കഥ ' ചലച്ചിത്രമായി ആവിഷ്ക്കരിക്കുമ്പോള്‍ അതിനു എത്രത്തോളം വിജയിക്കാനാവും എന്ന് ചിന്തിക്കുന്നവര്‍ക്ക് ഒരു ദൃശ്യവിരുന്നാണ് രഞ്ജിത്ത് ഒരുക്കിയ ഈ ചിത്രം .
ആദ്യമായാണ്‌ രഞ്ജിത്ത് മറ്റൊരാളുടെ കഥ സിനിമയാക്കുന്നത് എന്ന ഒരു പ്രത്യേകത കൂടി ഈ ചിത്രത്തിനുണ്ട് . പാലേരി എന്ന തന്റെ ഗ്രാമത്തില്‍ താന്‍ ജനിച്ച രാത്രിയില്‍ നടന്ന ഒരു കൊലപാതകം അന്വേഷിക്കാന്‍ 52 വര്‍ഷങ്ങള്‍ക്ക്‌ ശേഷം തിരിച്ചെത്തുന്ന ഹരിദാസ്‌ എന്ന പ്രൈവറ്റ് ഡിറ്റക്റ്റീവിന്റെ കഥ ആണ് ഈ നോവലിന്റെ ഇതിവൃത്തം.

വ്യത്യസ്തമായ ഈ പ്രമേയം ചിത്രീകരിക്കുമ്പോള്‍ അര നൂറ്റാണ്ട് പിന്നോട്ട് പോകേണ്ടി വരുമെന്നതിനാല്‍ തികഞ്ഞ ശ്രദ്ധയോട് തന്നെയാണ് രഞ്ജിത്ത് ഓരോ ഫ്രെയ്മും ഒപ്പിയെടുത്തിരിക്കുന്നത്.

1950 കളില്‍ നടക്കുന്ന ഒരു കഥ ആയതിനാല്‍ അന്നത്തെ രീതിയില്‍ ഒരു ചെറിയ ഗ്രാമം തന്നെ സംവിധായകന്‍ സൃഷ്ടിച്ചു. മലബാറിലെ ഒരു പഴയ ഗ്രാമത്തിന്റെ അന്തരീക്ഷം അസ്വാഭാവികത ഒട്ടും സ്പര്‍ശിക്കാതെ നിര്‍മിക്കുന്നതില്‍ രഞ്ജിത്ത് കൈവരിച്ച നേട്ടം ആണ് ഈ ചിത്രത്തിന്റെ ഏറ്റവും വലിയ മുതല്‍ക്കൂട്ട്. വസ്ത്രധാരണ രീതികളും , സംഭാഷണ ശൈലിയും പ്രേക്ഷകനെ 50 വര്‍ഷം പിന്നോട്ട് കൊണ്ട് പോകുന്നു. പല സന്ദര്‍ഭങ്ങളിലും പഴമയില്‍ മുഴുകി ഇരിക്കുന്ന പ്രേക്ഷകര്‍ക്ക് ഇന്നത്തെ കാലത്തിലേക്കുള്ള തിരിച്ചു പോക്ക് അരോചകമായി എന്ന് വരെ തോന്നാം .

കാസ്റ്റിംഗ് ആണ് സിനിമയുടെ മറ്റൊരു പ്രാധാന വിജയം. ഒട്ടു മിക്ക കഥാപാത്രങ്ങള്‍ക്കും വ്യക്തമായ പ്രാധാന്യം കൊടുക്കുന്നതില്‍ തിരക്കഥ വിജയിച്ചിട്ടുണ്ട്. മമ്മൂട്ടി 3 വ്യത്യസ്ത രൂപങ്ങളില്‍ പ്രത്യക്ഷപ്പെടുന്നെങ്കിലും എടുത്ത് പറയാനുള്ളത് 'മുരിക്കുംകുന്നത്ത് അഹമ്മദ് ഹാജി ' എന്ന വില്ലന്‍ കഥാപാത്രമാണ്. അദ്ദേഹം ഇത് വരെ ചെയ്ത മികച്ച കഥാപാത്രങ്ങളുടെ കൂടെ ചേര്‍ക്കാവുന്ന ഒന്നാണ് ഈ പ്രകടനം. രൂപത്തിലും ഭാവത്തിലും നോവലിലെ കഥാപാത്രത്തോട് 100 ശതമാനം നീതി പുലര്‍ത്തിയിരിക്കുന്നു. ജോര്‍ജ് ന്റെ ചമയം പ്രത്യേകം പ്രശംസ അര്‍ഹിക്കുന്നതാണ് .

പാലേരി ഗ്രാമത്തിലെ കഥാപാത്രങ്ങള്‍ എല്ലാവരും തന്നെ വളരെ ഭംഗിയായ അഭിനയം കാഴ്ച വച്ചിരിക്കുന്നു.. എന്നാല്‍ അഭിനയ സാധ്യത ഏറെ ഉണ്ടായിരുന്നുവെങ്കിലും 'ചീരു' ആയി അഭിനയിച്ച ശ്വേത മേനോന്‍ ചിത്രത്തിന്റെ നിലവാരത്തോടു പൂര്‍ണമായും യോജിച്ചിട്ടില്ല.. 'മാണിക്യം' ആയി അഭിനയിച്ച മൈഥിലിക്ക് വളരെയൊന്നും ചെയ്യാനും ഉണ്ടായിരുന്നില്ല.
രഞ്ജിത്തിന്റെ അഭിനയ കളരിയില്‍ നിന്നും വന്ന മറ്റു പുതുമുഖങ്ങള്‍ എല്ലാവരും തന്നെ അസാമാന്യ അഭിനയ പാടവം കാഴ്ച വച്ചിട്ടുണ്ട്.. ചീരുവിന്റെ മകന്‍ 'പൊക്കന്‍' ആയി അഭിനയിച്ച യുവനടന്‍ അസാധ്യമായ അഭിനയ മികവിലൂടെ ആ കഥാപാത്രത്തെ ഗംഭീരമാക്കി .

ബാര്‍ബര്‍ കേശവന് ജീവന്‍ കൊടുത്ത ശ്രീനിവാസന്‍ പതിവ് പോലെ തന്നെ തന്റെ ജോലി ഭംഗിയായി നിര്‍വഹിച്ചു. കേശവന്റെ ചെറുപ്പകാലം അഭിനയിച്ച യുവനടന്‍ രൂപത്തിലും ഭാവത്തിലും എന്നപോലെ അഭിനയത്തിലും ശ്രീനിവാസനോട് അടുത്ത് നിന്നു.

എന്നാല്‍ , കഥാനായകന്റെ കൂടെ അന്വേഷണത്തിന് വരുന്ന സ്ത്രീസുഹൃത്തായ സരയു എന്ന criminologist ആയി അഭിനയിച്ച ഗൌരി മുന്ജാല്‍ എല്ലാ രീതിയിലും പരാജയമായിരുന്നു. നായകന്‍ ഒറ്റയ്ക്ക് അന്വേഷിക്കാന്‍ വരുന്നതിന്റെ അപാകത ഒഴിവാക്കാന്‍ വേണ്ടി സരയു എന്ന കഥാപാത്രത്തെ അനാവശ്യമായി കഥയിലേക്ക് വലിച്ചിഴയ്ക്കും പോലെ തോന്നി. അതിനു വേണ്ടി നായകനുമായി ഒരു വിവാഹേതര ബന്ധവും വളരെ വിരസമായി ഉള്‍പ്പെടുത്തി.
മലയാളത്തില്‍ ആരും ഈ അപ്രാധാന വേഷം അവതരിപ്പിക്കില്ല എന്ന് തോന്നിയത് കൊണ്ടായിരിക്കും ഈ അന്യഭാഷാ നടിയെ ചിത്രത്തിലേക്ക് വിളിച്ചത്. 'ഇനി ഒരു criminologist ഇന്റെ സഹായം നിനക്ക് ആവശ്യമാണ്' എന്ന് നായകനോട് തുടക്കം തന്നെ ഈ കഥാപാത്രം പറയുന്നുണ്ടെങ്കിലും അങ്ങനെ ഒരു ആവശ്യമേ വന്നില്ല എന്നതാണ് സത്യം.

മാണിക്യം കൊലക്കേസ് വളരെ ഭംഗിയായി ഇഴകള്‍ കോര്‍ത്തിണക്കി കൊണ്ട് പോകുന്നതിനോപ്പം തന്നെ അര നൂറ്റാണ്ട് മുന്നിലെ രാഷ്ട്രീയ കേരളത്തിനെ പച്ചയായി വരച്ചുകാട്ടുകയും ചെയ്യുന്നുണ്ട് ഈ ചിത്രം . തൊഴിലാളി വര്‍ഗ്ഗത്തിന്റെ താല്‍പ്പര്യങ്ങള്‍ക്ക് വേണ്ടി സൃഷ്ട്ടിക്കപ്പെട്ട കമ്മ്യുണിസ്റ്റ് പാര്‍ട്ടിയുടെ പ്രത്യയശാസ്ത്രങ്ങളെയും കാപട്യങ്ങളെയും അതേ സമയം തന്നെ കോണ്ഗ്രസ് പാര്‍ട്ടിയുടെ അടവ് നയങ്ങളെയും വളരെ തന്മയത്വത്തോട്‌ കൂടി ചിത്രീകരിച്ചിരിക്കുന്നു .
കമ്മ്യൂണിസ്റ്റ്‌ പ്രസ്ഥാനത്തിന്റെ മൂല്യങ്ങളില്‍ വിശ്വസിക്കുകയും ആ വിശ്വാസങ്ങള്‍ തകരുമ്പോള്‍ ഉള്ള വേദനയും ശ്രീനിവാസന്‍ പറയുന്ന ഡയലോഗുകളില്‍ ശക്തമായി പ്രതിപാദിച്ചിട്ടുണ്ട് . പ്രസ്ഥാനത്തിന്റെ വളര്‍ച്ചയ്ക്ക് വേണ്ടി മൂല്യങ്ങളെ ബലി കഴിക്കേണ്ടി വരുന്ന കമ്മ്യൂണിസ്റ്റ്‌കാരനെ ടി ദാമോദരനും ഉജ്ജ്വലമാക്കി.

ചിത്രത്തിന്റെ ഒരു പോരായ്മ എന്ന് പറയാവുന്നത് ക്ലൈമാക്സ്‌ രംഗത്ത് മമ്മൂട്ടിയുടെ രണ്ടു കഥാപാത്രങ്ങള്‍ തമ്മിലുള്ള കൂടിക്കാഴ്ച ആണ്. അത്രയും നേരം നിലനിര്‍ത്തിക്കൊണ്ട് പോന്ന ശക്തമായ തിരക്കഥയുടെ പ്രകടമായ ഒരു അസ്സാനിധ്യം ആ രംഗത്തില്‍ പ്രേക്ഷകന്അനുഭവപ്പെടുന്നുണ്ട്.

ബിജിബാല്‍ ഈണം നല്‍കിയ ടൈറ്റില്‍ ഗാനവും ഹരിഹരന്റെ ഒരു ഗസലും മാത്രമാണ് ചിത്രത്തില്‍ ഉള്ളതെങ്കിലും മാണിക്യത്തിന്റെ കഥ പ്രേക്ഷക മനസ്സില്‍ ടൈറ്റില്‍ ഗാനത്തിലൂടെ തന്നെ പകര്‍ന്നു തരാന്‍ ശരത്തിനും ബിജിബാലിനും കഴിഞ്ഞു.

ഗ്രാമീണ ഭംഗി നിറഞ്ഞ പാലേരിയുടെ സൗന്ദര്യം ഒപ്പിയെടുക്കുന്നതില്‍ വിജയിച്ച മനോജ്‌ പിള്ള വളരെ പ്രതീക്ഷകള്‍ തരുന്ന ഒരു ചായാഗ്രാഹകനാണ്. രാത്രിയും നിലാവും നാട്ടുവഴികളും എല്ലാം തന്നെ വളരെ മനോഹരമായി മനോജ്‌ ക്യാമറയില്‍ പകര്‍ത്തിയിരിക്കുന്നു.

കഥയുടെ തീവ്രതയും അഭിനേതാക്കളുടെ മാനറിസങ്ങളും അല്‍പ്പം അതിര് വിട്ട ഡയലോഗുകളും ഉള്ളതിനാല്‍ കുടുംബ പ്രേക്ഷകര്‍ക്ക് തീര്‍ത്തും ആസ്വദിക്കാന്‍ കഴിയും എന്ന് വിശ്വസിക്കുന്നില്ലെങ്കിലും സാങ്കേതികമായും കലാപരമായും ഈ ചിത്രം രഞ്ജിത്തിന്റെ കിരീടത്തില്‍ ഒരു പൊന്‍തൂവലാണ് എന്ന കാര്യത്തില്‍ ഒരു സംശയവും ഇല്ല.

നീലത്താമര[സിനിമ]

2009-12-20T06:27:00.001-08:00

പഴയ നീലത്താമരയുടെ റീമേയ്ക് എന്നുള്ള വസ്തുത മനപ്പൂര്‍വം ഒഴിവാക്കിക്കൊണ്ട്, തികച്ചും പുതിയൊരു ചിത്രത്തെക്കുറിച്ച്......

മനോഹരമായ ചിത്രം .
മലയാളിക്ക് ഗൃഹാതുരത്വതിന്റെ ഓര്‍മ്മകള്‍ തിരിച്ചു കൊണ്ട് തന്നതിന്
എം ടി - ലാല്‍ ജോസ് സഖ്യത്തിനോട് കടപ്പെട്ടിരിക്കുന്നു.
പൂര്‍ണമായും സ്ത്രീ കഥാപാത്രങ്ങള്‍ക്ക് പ്രാമുഖ്യം ഉള്ള ഒരു തിരക്കഥ ആണ് നീലത്താമരയ്ക്ക്.
എടുത്തു പറയാനുള്ളത് കേന്ദ്ര കഥാപാത്രമായ കുഞ്ഞിമാളുവിനു ജീവന്‍ കൊടുത്ത അര്‍ച്ചന കവി എന്ന പുതുമുഖ നടിയുടെ പ്രകടനം തന്നെ. എം ടി യുടെ തൂലികയില്‍ വിരിഞ്ഞ കുഞ്ഞിമാളുവിനെ അസാമാന്യ അഭിനയ ശേഷി കാഴ്ച വച്ച് അര്‍ച്ചന കവി അവിസ്മരണീയമാക്കിയിരിക്കുന്നു. ഭാവാഭിനയവും ശരീരഭാഷയും സംഭാഷണത്തെക്കാള്‍ പ്രാധാന്യം ഉള്ളതാണെന്ന് അടിവരയിട്ടു തെളിയിച്ചു കൊണ്ട് കുഞ്ഞിമാളു പ്രേക്ഷകരെ വിസ്മയിപ്പിച്ചിരിക്കുന്നു.

ഒരു പുതുമുഖ നടിക്ക് അസാധ്യം എന്ന് തോന്നിപ്പിക്കുന്ന തരത്തിലായിരുന്നു അര്‍ച്ചനയുടെ പ്രകടനം.ഹരിദാസിനെ അവതരിപ്പിച്ച കൈലാഷും പ്രസംസനീയമായ പ്രകടനം കാഴ്ച വച്ചിരിക്കുന്നു. 70 കളിലെ ധനിക തറവാട്ടിലെ ചെറുപ്പക്കാരനായി വേഷമിട്ട കൈലാഷിനെ അന്നത്തെ സാമൂഹിക വ്യവസ്ഥയുടെ പ്രതീകമായി എം ടി എടുത്തു കാട്ടിയിരിക്കുന്നു. പ്രേക്ഷക മനസ്സില്‍ ഒരു വില്ലന്റെ സ്ഥാനം ലഭിക്കാതെയിരിക്കുമ്പോള്‍ തന്നെ ഹരിദാസിന്റെ ചെയ്തികള്‍ ഒരു വ്യവസ്ഥിതിയുടെ ഭാഗമാക്കി ചിത്രീകരിക്കാന്‍ സംവിധായകന് കഴിഞ്ഞിട്ടുണ്ട്.

ഹരിദാസ്‌ വിവാഹം കഴിച്ചു കൊണ്ട് വരുന്ന രത്നം എന്ന കഥാപാത്രത്തെ അവതരിപ്പിച്ച സംവൃത സുനില്‍ , ഉന്നത വിദ്യാഭ്യാസവും തന്റേടവും ആണ്‍ മേല്ക്കൊയ്മക്ക് എതിരെ ശബ്ദം ഉയര്‍ത്തുകയും ചെയ്യുന്ന ശക്തയായ, എന്നാല്‍ സ്നേഹസമ്പന്നയായ പെണ്‍കുട്ടിയെ തന്മയത്വത്തോട്‌ കൂടി അഭിനയിച്ചു ഫലിപ്പിച്ചു.ഹരിദാസിനെ അമ്മ മാളുഅമ്മയായി വേഷമിട്ട ശ്രീദേവി ഉണ്ണി കഥയുടെ ആദ്യാന്തം നിറഞ്ഞു നിന്നു. എല്ലാം അറിഞ്ഞിട്ടും ഒന്നും ചെയ്യാനാവാതെ നിസ്സഹായതയോടെ കുഞ്ഞിമാളുവിനെ കരഞ്ഞു കൊണ്ട് പറഞ്ഞയക്കുന്ന മാളുഅമ്മയുടെ ഭാവങ്ങള്‍ അനായാസമായും എന്നാല്‍ വൈകാരികത ചോര്‍ന്നു പോകാതെയും ശ്രീദേവി ഉണ്ണി ഭംഗിയാക്കി.

കുഞ്ഞിമാളുവിന്റെയും രത്നതിന്റെയും പ്രായം ചെന്ന കഥാപാത്രങ്ങള്‍ക്ക് ജീവന്‍ നല്‍കിയ പാര്‍വതിയും ജയ മേനോനും മികച്ച അഭിനയമാണ് കാഴ്ച വച്ചിരിക്കുന്നത്. മിതമായ അഭിനയ ശൈലി കൊണ്ട് അപ്പുക്കുട്ടന്‍ എന്ന ചെറിയ കഥാപാത്രമായി സുരേഷ് തിളങ്ങി
വിദ്യാസാഗറിന്റെ അതിമനോഹരമായ 3 ഗാനങ്ങളും മികവുറ്റ ഗാനചിത്രീകരണവും ചിത്രത്തിന്റെ മാറ്റ് കൂട്ടുന്നതില്‍ പ്രാധാന പങ്കു വഹിച്ചിട്ടുണ്ട് . കാര്‍ത്തിക് , V ശ്രീകുമാര്‍ , ശ്രേയ ഘോഷല്‍ , വിജയ്‌ പ്രകാശ് എന്നിവര്‍ മലയാള സിനിമാ പിന്നണി ഗാന രംഗത്ത് കരുത്താര്‍ജിച്ചു വരുന്നതിന്റെ ഉത്തമ ഉദാഹരണങ്ങളാണ് ഈ ഗാനങ്ങള്‍ ഓരോന്നും.എന്നും മലയാളി പ്രേക്ഷകന് നൊസ്റ്റാള്‍ജിയ തിരികെ കൊണ്ട് വരുന്നതില്‍ വിജയിച്ചിട്ടുള്ള ലാല്‍ ജോസ് ഗാനരങ്ങങ്ങളില്‍ അമ്പലവും ആല്‍ത്തറയും കുളവും കല്‍പ്പടവുകളും ഗ്രാമഭംഗി തുളുമ്പിപോകാതെ ചിത്രീകരിച്ചിരിക്കുന്നു.

റീമ കല്ലുങ്കല്‍ അവതരിപ്പിച്ച ഷാരത്തെ അമ്മിണി എന്ന കഥാപാത്രത്തിന് എം ടി വേണ്ടത്ര പ്രാധാന്യം കൊടുത്തിട്ടില്ല. അങ്ങനെ ഒരു കഥാപാത്രത്തിന്റെ ആവശ്യകത എത്രത്തോളം ഈ തിരക്കഥയില്‍ ഉണ്ട് എന്ന് സംശയം തോന്നുന്ന തരത്തില്‍ ആണ് ഈ കഥാപാത്രത്തിന്റെ രംഗങ്ങള്‍ ആവിഷ്ക്കരിച്ചിരിക്കുന്നത്.. എന്ന് മാത്രമല്ല കഥാപാത്രത്തിന് സംഭവിച്ച ദാരുണമായ അന്ത്യം എന്ത് കാരണം കൊണ്ടാണ് എന്ന് പല പ്രേക്ഷകര്‍ക്കും മനസ്സിലായിട്ടില്ല എന്നാണു അറിയാന്‍ സാധിച്ചത്.

കുറഞ്ഞ ചിലവില്‍ മികച്ച സിനിമ നിര്‍മിക്കുക എന്ന പുതിയ തന്ത്രം ലാല്‍ ജോസ് പരീക്ഷിച്ചു വിജയിച്ചു. നല്ല സിനിമകള്‍ എന്നും കൈ നീട്ടി സ്വീകരിച്ചിട്ടുള്ള മലയാളികള്‍ക്ക് തീര്‍ച്ചയായും ആസ്വദിക്കാവുന്ന ഒന്നാണ് നീലത്താമര !